Ym don Doctor Specialist ha Bagmara Civil Hospital, bthah u MR ban pynbiang ia ki jingdonkam

U Myntri Rangbah ka Jylla u Conrad K Sangma hynne ka sngi, ula sngap ia ki jingeh ba la pynpaw ki bor pyniaid district ka shnong bad kiba don bynta ha ka kam ha ka jingleit jngoh ia ka Baghmara.Ha kane ka sngi la iadonlang ki heh ophisar bad ki nongmihkhmat na ki tnad bapher bapher kynthup ia u Chief Secretary u Shakil P Ahammed ha ka jingialang ba la pynlong ha ka Conference Hall jong ka Baghmara Circuit House.La iakren halor ki mat ba ia dei bad ka Baghmara Civil Hospital, ia kaba la pyntip ba la phah ia ki doktor specialist sha ka hospital hynrei ym shym la don mano mano ba wan trei haduh mynta ka ba long  ka jingbym don ki doktor specialist ban ai ka jingshakri.Ka hospital ia mynta ka la iaid na ka jingdon 11 ngut ki Medical Officer ha ka jaka 22 ngut ki doktor kynthup ki doktor specialist bad ka jingduna ki nurse bad kiwei kiwei ki nongtrei.

Ha kajuh ka por, la pynpaw ba ka Civil Hospital ka dang don hapdeng ka jingpynheh bad ka jaka buh snam ne Blood Storage Unit ka la treikam bad ka Operation Theatre ruh ka la treikam bad ka jaka puid ia ki nongpang.La sdang ruh ia ka projek ban buh ia ka Sewage Treatment Plant (STP) ha hospital bad la khmih lynti yn pyndep ha kine ki 3 ne 4 taiew ban wan.U Myntri Rangbah ula bthah ia ki ophisar ba kin pynbeit mardor ia ka jingduna ki Nurse bad ki nongtrei ha kane ka hospital.La iakren ruh ban pynbiang umbam umdih, ka jingdon ia ki kali kit nongpang ne Ambulance, ki jingtei ka jaka sumar, ha kaba la bthah ia ki ophisar ki dei ban pynthikna ba kam dei ban don ka jingthud ban pynpoi ia ka um da kaba pyndonkam ia ki jingdon jingem bad ruh ban sdang noh mardor ia ki kam ban phah maramot.

Halor ka mat kaba ia dei bad ka jingsiew ia ka bai jaka, u Myntri Rangbah ula kular ba un sa pyntip ia kane ka kam sha ka Ministry of Home Affairs.Halor ka jaka na ka bynta ka Baghmara Stadium, la ai ka jingbthah ia ki ophisar ba kin pynbeit noh mardor ia kane ka kam hapoh jong kane ka taiew.