Khlem seisoh ki kular u Dy. CM, byrngem ujor sha Ïingbishar ka SSHL

Ka Seng Samla Hima Langrin (SSHL) ha ka Sngi Balang ka la hiar jurip ia ka surok Lailad (Rajaju) – Borsora kaba jngai 6 KM hapoh Ranikor Civil Sub-Division, South West Khasi Hills District bad ka la pynpaw ia ka jinglyngoh ban lap ba ka jingtrei kam pat sdang satia watla u Deputy Chief Minister, Bah Prestone Tynsong u la kular ban pyndep ia ka jingtrei hapoh 24 bnai. Ia kane ka projek kaba la mang tyngka haduh 18 klur lyngba ka Special Assistance to States for Special Investment 2022-23 na ka bynta ban pynheh bad siangrong ia kane ka surok.

Haba ïakren bad ki lad pathai khubor hadien ba la dep ban jurip, u President ka CEC Seng Samla Hima Langrin u P.S. U bah Lyngdoh u la pynpaw ia ka jingsngewdiaw ba ka seng kam shym la lah wat tang ban pyndep ia ka jingjurip ia ka surok haduh Borsora namar ba ki hap ban wanphai noh tang shiteng lynti namar ka jingsniew palat jong ka surok kaba u la kam ba u kontraktor um pat sdang ia ka jingtrei wat haduh mynta.

U bah Lyngdoh u la pynpaw ruh ia ka jingsngew lyngngoh ba katkum ka RTI ba la ioh ha ka 3 tarik u Naitung, 2025 na ka ophis jong u Executive Engineer PWD (Roads) Ranikor Division, 15% ka jingtrei la dep bad ka sorkar ruh ka la pyllait ia ka Running Bill, hynrei kaba sngewsih ka long ba ha ka jingleit jurip ia ka jingtrei, la lap ba u Contractor um pat sdang satia ia ka jingtrei. “Kane ka long kaei kaei kaba ngim lah ban pdiang satia”, la ong u bah Lyngdoh.

U bah Lyngdoh u la ong ba ka Seng Samla Hima Langrin ka la rai ban ai por hynriew bnai ia ka tnat PWD Roads ban pyndep ia ka jingtrei na ka bynta katei ka surok, lada kim lah, ka seng ka leh da kaba tyngeh wat ban ujor sha Iingbishar ruh.