Yn pynpaw ka sorkar ia ki mar ki mata ba pynmih da ki paid riewlum ka ri ha ki iew ka pyrthei

U myntri ka tnad Commerce & Industry ka sorkar pdeng, U Piyush Goyal u la ong ba baroh ki mar ki mata bad ki tiar ki tar ba la pynmih da ki paidriewlum kiba biang ban shalan shabar ri yn ioh ia ka jingkyrshan ba pura na ka tnad Department of Commerce lyngba bun ki lad ki lynti, kynthup ia ka rynsan e-commerce, ki jaka buh ia ki tiar ki tar ki ri ka pyrthei ban pyni bad ban die, bad ka jingdie ia ki  ha ka dor trai bad ha ka dor die ha ki bynta bapher bapher. U Goyal u la ong ia kane ha ka sngi ba u la ai jingkren ha ka Tribal Business Conclave 2025 ha New Delhi mynta ka sngi ha ka jingiadon lang jong u myntri ka tnad Tribal Affairs ka sorkar pdeng U Jual Oram. Ia kane ka lympung la pynlong da ka tnad Department for Promotion of Industry and Internal Trade (DPIIT), Ministry of Commerce and Industry, ryngkat ka jingiatreilang bad ka Ministry of Tribal Affairs, kane ka lympung ka long ka kum ka dak pynsah kynmaw ha ka Janjatiya Gaurav Varsh, ban rakhe ia ka lyngkhuh sngikha ba 150 jong u Birsa Munda.

U myntri ka tnad Commerce u la pyntip ha kane ka lympung ba mynta la shna ia ka skhim ban pynkhlain ia ka jingshalan ia ki mar ki mata ban pyntikna ba ki mar ki mata bad ki tiar ki tar jong ki paidriewlum kin ioh ia ka jingithuh bad pynpoi sha ki iew ki hap kaba ki dei hok ban ioh la ka long ha la ka jong ka ri bad sha ki iew sha bar ri.  U Goyal u ong baroh bad iew hapoh ri lajong bad shabar ri ki don ka jingtyrwa ia ka kabu kaba heh na ka bynta ki mar ki mata bad ki tiar shna da ka kti, bad ba ka sorkar ka la shim ia ki sienjam kiba biang ban shim ia kane ka kabu ha ki snem ban wan.U myntri u la ban jur ba u myntri rangbah duh ka ri u ngeit ba ka jingkiew ba shisha jong ka ri kan jia tang lada ki paid riewlum ruh ki kiew. U la ong ba ka jingkiew ka India bad ka roi ka par ka shong ha ka jinglah ban pyntikna ba ka jingkiew ha kane ka liang ka rung sha man la ki thliew iing, khamtam ia ki paid riewlum bad kito kiba sah ha ki jaka nongkyndong. U Goyal u la ban jur ba ka jinglah ban kyntiew ia ki nongshong shnong kiba dei ki riewlum bad ki trai ri trai muluk ka long kaei kaei kaba ka sorkar ka buh ha khmat eh, kaba pyni ia ka jingtrei ba radbah jong ka sorkar na ka bynta ban wanrah ia ka roi ka par kaba kynthup lang ia baroh bad kaba iaineh. 

U Goyal u la kynmaw burom ruh ia u Birsa Munda bad ong ba u la pyni ia ka lynti bad ka jinglong nongialam sha ki paid nongshong shnong kiba dei ki riewlum. U la bynra ba ka ri ka ioh mynsiem na ka jingim jong u Birsa Munda bad bud ia ki dienjam jong u ban kyntiew ia ki paid nongshong shnong riewlum, ban pynkhlain shuh shuh ia ka kamai ka kajih, bad pyntikna ba man la ki longiing jong ki paid riewlum kan dap da ka jingkmen bad ka jingpahuh pahai. U Goyal u la pynkynmaw ia ki kyntiwn jong u Birsa Munda, “Ka jaka jong ngi, ka hima,” bad ong ba ki paid riewlum ka ri ki la mad ia shibun ki jingeh bad ka jingduh ia ki jingmyntoi.