Yn shah tang ki kali ba 9 metric ton ban iaid na ka jingkieng Umiam: Prestone

U Symbud Myntri Rangbah ka jylla ba peit ia ka tnad PWD u bah Prestone Tynsong ula ong ba ka sorkar ka shah ban iaid tang ki kali ba jrong hapoh 2.80 metre na jingkieng Umiam bad ka jingkhia jong ka kali kam dei ban palat ia ka 9 metric ton. Ia kane u Symbud Myntri Rangbah ula jubab ha ka kynta kylli jingkylli ba la wanrah da u MLA ka Amlarem u bah Lahkmen Rymbui hynne ka sngi halor ka jingkhang ban iaid ia ki kali heh na jingkieng Umiam. U bah Prestone ula ong ba ia kane ka jingpyrkhing ban iaid ki kali kiba palat ka jingjrong 2.80 meter la khang, khnang ban iada ban lait na kano kano ka jingma kum ki bos Night Super kiba la palat ia ka jingkhia bad ka jingjrong.

Halor ka jingkylli bynrap u bah Renikton L Tongphar, u bah Prestone u la ong ba kito ki kali rit ruh kiba kit phlang, synsar, siej ruh la pyrkhing ban iaid lada palat ia ka jingthew ha ka jingjrong. U Symbud Myntri Rangbah ula pyntip ba ia ka DPR ban shna ia ka surok Four Lane na Umiam sha Shillong la aiti ha ka NHIDCL da ka tnad Ministry of Road Transport.“Nga tikna ba ka DPR yn pyndep kloi katba lah namar kane ka surok Four Lane ka long kaba donkam bha na bynta ka ioh ka kot bad ban pyllait ia ka jingeh jong ki paidbah kiba iaid ba ieng,” ong u bah Prestone. Ha kajuh ka por, u bah Prestone ula kubur ba ka jingbym lah ki kali heh ba kit  marbam ban pynpoi sha Shillong na jingkieng Umiam, ka la ktah ia ka dor ka mur jong ki mar ki mata. Namar kane ka daw ka sorkar ka la jan dep ban shna ia ka surok VIP kaba 23 km kaba pyniasoh na kad liengsuin Umroi sha Mawlai.

“Ia kane ka surok VIP yn lah ban pyndep ha shwa ban kut une u snem bad mar iadep kane ka surok, ki kali heh ki lah ban iaid na kane ka surok kaba dang don mynta hapdeng ka jingshna,”ula ong.U la bynrap ruh ba ka don ruh sa kawei ka surok na Mawdiangdiang sha Shillong, watla ka kham jngai khyndiat ban poi sha sor, hynrei ki briew ki lah ban iaid ban pyndonkam na kane ka surok ban leit ban wan khnang ban lait ban iaid na jingkieng Umiam.