Ka sorkar jylla hynne ka sngi ka la ai ka jaka ha Tura sha ka Inter Continental Hotels Group (IHG) ban tei ia ka 5 Star Hotel ha ka jinglut jingsep ba T.130 Klur.Ia katei ka jingialang aiti ia ka jaka, la pynlong da ka Tnad Tourism ha Hotel Polo Orchid, ia kaba la wan ban iashim bynta da u Myntri Rangbah ka jylla u Conrad K. Sangma, u Myntri kam jngohkai u Timothy D. Shira, u Myntri ka Tnad PHE bad Housing u Marcuise N. Marak, u Gautam Tyagi uba mihkhmat ia ka IHG, u Deputy Commissioner ka West Garo Hills u Vibhor Aggarwal, ki heh ophisar sorkar bad kiwei kiwei. Haba kren ha ka jingialang u Myntri Rangbah ula ong, ba ka rai ban thaw ia ka 5 Star Hotel ha Tura ka pyni ia ka jingiohi jngai jong ka jylla ha kaba iadei bad ka ioh ka kot bad bun kim poi pyrkhat ba ka Tura kan sa ioh ia ka 5 Star Hotel. “Ka 5 Star Hotel kam dei tang ka jaka sah kaba remdor, kadei ka enjin jong ka ioh ka kot. Ka wanrah ia ki jingialang, ki nongjngohkai, ki jingialang sorkar bad ki jingialang jong ki kompani. Ki briew ki wan, ki briew ki sah, ki briew ki pynlut bad kane ka ai jingiarap ia ka ioh ka kot ha ka thain” la ong u Conrad.
Kane ka project, kadei kaba la mang ban pynlut kumba T.130 Klur, kadei kaba la buh ha ka kyrdan kum shi bynta jong ka sienjam ka Meghalaya hapoh jong ka Mission 10, kaba la sdang ha u snem 2019 ban pynlong ia ka jylla ban kynjoh ka ioh ka kot kaba $10 Billion.U Conrad Sangma ula ong ba ioh ka kot ka jylla kala kiew na kaba don hapoh ka $4 billion ha u snem 2018–19 mynta sha ka $7 billion, da kaba buh ia ka thong ban kynjoh sha ka $10 billion ha ki snem kiban dang wan bad ula iathuh ia ka jingkiew sted ha kaba iadei bad ka jingpynlut jong ka jylla na ka T. 6,811 Klur ha u 2014 sha ka T.23,475 Klur ha u 2025 bad ka jingkiew ka Capital Investment na ka T.1,259 Klur sha ka T.6,395 Klur ha katei kajuh ka por. Katkum ka jingong ka jongu, ka jingshim ram ne Borrowings kala neh hapoh jong ka jingbuh ia u pud, kaba la kyrshan da ka jingiohlum khajna kaba heh jong ka jylla bad ka jingkiew ka khajna na ka sorkar pdeng. U Myntri Rangbah ula pynbna ruh ban tei ia ka “Homestay-cum-Games Village” na ka bynta ka National Games 2027 bad hapoh jong kane ka scheme, ki nongioh jingmyntoi kin iohpdiang 70% ka Subsidy ban tei ia ki Homestay kiba la pynwandur kum ki Sports Hostel kiba lah ban pyndep ia ki kyndon jong ka Games Guidelines bad hadien ba la dep katei ka jingiakob, kine ki jingtei kin iai don bad ki nongioh jingmyntoi ba kin pyniaid iew pat ia ki.
Ula ong, ba kane ka sienjam kan shimkhia ban pynbiang ia ka jingduna ki jaka sah ha Tura bad Jowai ha ka por ba pynlong ia ka jingialehkai ha ryngkat bad ka lad ia ki nongsengkam bad ka lad ban kamai kajih.U Conrad ula ong, ka Meghalaya kadei ban lah ban pynbiang ia baroh ki jingdonkam jong ki nongjngohkai bad kumta ka long kaba donkam ban pynbiang ia ka 5 Star hotel na ka bynta ki nongwankai kiba don ba em bad ki Homestay na ka bynta kito kiba kwah ban pyniasoh bad ka kolshor.U Myntri Rangbah ula maham ia ka IHG da kaba ong, “Lada kim lah ban pyndep ha ka por kaba la buh, kan long kaba eh. Ngin ym lah ban pdiang ia ka jingpynslem” bad ka bynrap ba ka jingiatehkular ka kynthup ruh ia ki kyndon kiba khlain ban aikam aijam ban ai jingmyntoi ia ki nongshong shnong. Katba u Timothy D. Shira ula pyntip ba ia ka jingtei kaba la don lypa jong ka Hotel Polo yn sa pynpra noh bad yn sa tei bujli noh da ka 5 Star Hotel kaban iaryngkat kyrdan ha ka pyrthei bad ka jingthmu ka long kaba shai kdar, ban tei ia ka jingtei kaba skhem khnang ba ka kam jngohkai kan kiew bad kan iai neh, kaba don ruh ia ka jingkitkhlieh ia ka mariang bad ia ka imlang sahlang.