Yn wanrah ka rukom treikam thymmai ban weng jingeh ki nongtrei 108

Ka Sorkar Jylla ka la pynbna ba ka Sorkar Jylla ka la rai ban wan rah ia ka rukom treikam ba thymmai ban leh eiei halor ki jingeh kiba ia dei bad ki nongtrei ka 108 Emergency Services ha Meghalaya. Ia kane la pyntip da ka Myntri ka tnat ka koit ka khiah ka Kong Ampareen Lyngdoh ha kaba kala pynpaw ruh ba ka Sorkar ka dang pynkhreh ia ka thong ban pynbeit ia baroh ki jingeh haba iadei bad ka jingtyrwa ban aiti noh ia ka Emergency Service sha ki kompani shimet.Haba kylli halor ka jingdawa ba dang shen jong ki nongtrei 108 ban pynkiew ia ka tulop da T.5000, ka Myntri ka la ong ba ka jingpynkiew ka dei kaba dang leh dang shen bad ong “To ngin ym iakren kumne ha ki lad pathai khubor namar ki nong trei ka 108 bad ma nga, kaba mihkhmat ia ka Sorkar bad u MD (ka National Health Mission) ngin sa iakynduh lada donkam hynrei ka sien ba khatduh ba nga iakynduh ia ki, kiei kiei baroh ki biang lut”.

Haba pynpaw ba ka Sorkar kam pat don satia ia ka rukom treikam ia mynta bad ka NHM ka dang khmih iaki nongtrei, ka Myntri kala ong “Dang shen, katto katne ki kam la hap ban aiwai sha ka Shishupal Company. Ngi dang pynkhreh mynta ban pynthikna ba ngin don noh ia ka rukom treikam la ka jong”.“Kaei kaba ka Sorkar kan leh, ngi dang iakren ha ka kyrdan jong u Myntri Rangbah. Kam bha satia ia nga ban ong eiei ia ka kam kaba dang don hapdeng ka jingbisha” kala ong. Ka Myntri ka la pynpaw ba ka Sorkar ka la iakynduh jingeh ban sumar ia ki kali kit nongpang (ambulance) namar ka jingbym don ka kompani ban khmih ia ki.

Halor ka jingslem ban aiti ia ka 108 service sha ki kompani shimet, ka Myntri kala ong ba kane ka kam ka iaid palat ia ka jingkhot tender bad mynta ka dei ka kam ban wad ia ka formula kumno ban pynbeit ia ki jingiapher jingmut hapdeng ki kynhun kiba iadon bynta. Ka Myntri kala kular ba ka Sorkar kala kut jingmut ban pynthikna ba ki nongtrei 108 kin shah kdup ha ka insurance bad kiwei kiwei ki jingmyntoi, haba khmih ia ka kam ba ki trei.