Ka iingkashari hynne ka sngi ka la rai ban phah 6 sngi sha ka Police Custody ia ki 3 ngut ba shah kem dang shen na Madhya Pradesh halor ka jingsuba donkti buh rieh ia ki sabut halor ka jingshah pyniap u Raja Raghuvanshi ha Sohra. Ka Special Investigation Team (SIT) hynne ka sngi ka la wan ialam ia ki 3 ngut ba la shah kem na Madhya Pradesh kynthup ia u Silom James, u Lokhndra Singh Tomar bad u Balbir Ahirbar halor ka jingkynnoh ban pyndam ia ki sabut ba ia dei bad ka jingshah pyniap u Raja Raghuvanshi ha Weisawdong, Sohra ha ka 23 tarik u Jymmang 2025. Ki pulit hynne ka janmiet ki la leit ialam ia 3 ngut sha ka iingkashari ban tian bishar. U Assistant Public Prosecutor u Tushar Chanda ula iathuh ka iingkashari ka la rai ban set 6 sngi hapoh ka Police Custody ia ki 3 ngut khnang ba ki pulit kin ioh ban pynlong ia ka jingtohkit.
Ula iathuh ki Pulit ki la pan 8 sngi hynrei ka Iingkashari ka la ai lad tang 6 sngi ban set ia ki ha ka Police Custody. Ka SIT ka la wan ialam ia ki 3 ngut sha Shillong hynne ka mynstep bad leit buh ha Sadar Police Station ha ryngkat ha ka jingpynjur ia ka jingai jingiada ia ki. Ha ka sngi Balang ki pulit ki la pyntip ba u Silom James ula leit ialam ia ki pulit hajan kawei ka wahduid bad kila ioh kurup ia kawei ka pistol shna hi ne Country Made ryngkat bad artylli ki Magazine bad 2 tylli ki kuli .32 na kawei ka wahduid.Ki pulit ki la ioh kurup ruh ia ka pisa T.50000 na ka kali I10 kaba don ia u number MP09WG 2352, ia kaba la sei na ka pla buh Laptop jong u Raja Raghuvanshi bad ia katei ka pla la thang bad la kam ba ia ka Laptop ula bret sharud surok bad ym shim la lap satia ia ka.
U Lokendra Singh Tomar ula shah kem na Gwalior udei u trai jong ka Flat kaba don ha Dewas Naka, ha kaba ka Sonam kala leit ban rieh ha ka por ba kala don ha Indore bad kila kem ia u Balbir Ahirbar u nongap pahara halor ka jingsuba jur ba udei u briew uba don ia ki jingtip kiba kongsan shaphang ka Sonam Raghuvanshi bad kiwei pat.