Hadien 3 sngi lap ïa ka samlaba jah na Umsaitsning

Ka long ka khubor kaba ai mynsiem ia kiba haiing hasem, kata hadien 3 sngi ba ki lah ban lap noh ia kawei ka samla ba la jah na la iing naduh ka 25 tarik Lber, ia kane ka samla la lap biang ha ka 28 tarik Lber bad la rah ban sumar ia ka ha Bethany Hospital.
Katkum ka khubor, la iathuh ba kane ka samla kaba la jah na la iing la tip kyrteng kum ka samla Larikynti Nongbet (24) bad kaba shong basah ha Umsaitsning Lad Mawrong.
Na ka liang ki bahaiing, lyngba u Mama jong kane ka samla u Bah A. Nongbet, la iathuh ba hadien ka jingiawad kaba la neh katto katne sngi ki bahaiing ki la lap noh ia kane ka samla bad mynta ki la ialam ban shah sumar shwa ia ka ha Bethany Hospital Nongpoh.
La ong ruh, ba ia mynta kim kwah ban kren eiei halor ka jingjah jong kane ka samla na la iing namar ba ki dang sumar bha shwa ia ka namar ka jingshitom, la bynrap ba mar ia lap ia ka la ialam sumar shwa ha Umsning CHC hynrei la ialam noh sha Bethany Hospital ban ioh jingsumar ba paka.
Shuh shuh ruh, na ka liang ka iing ka sem ki la pynpaw ia ka jingsngewnguh kaba khraw ia baroh kiba la ia don bynta ban ia wad ia kane ka samla kata naduh ka Dorbar Shnong, ki Seng Samla, Seng Kynthei Shnong, ki bor ka Umsning Police Station, ka Balang Presbyterian, ki dkhot ka RBYF Umsaitsning, ki paralok parajor bad ki bahaiing hasem baroh.