Ki domestic LPG ki biang, duna ki Commercial na ka jingpynkylla e-KYC: Pynshai ka tnad sam marbam

Ka ophis Directorate Food, Civil Supplies bad Consumer Affairs ka jylla ka la pynshai kam don ka jingduna tyndong lyer jingshet LPG na bynta ka jingpyndonkam ha ha iing bad ka sorkar ka la buddien ryngkat ki komiti LPG Jylla bad District da ka jingïatreilang bad ki Oil Marketing Compani ban pynthikna ba kan ym don ka jingthut ban sam tyndong lyer sha ki paidbah ka jylla.
Ka jinglong jingman ha jylla ka dang biang haduh mynta, ka jingbthah ka Sorkar India halor ka jingai jingsam ia ki tyngdong lyer naduh ka 11 tarik u Lber hapoh ka ri ka dang haduh ka 20 tarik u Lber. Hadien ka mih ka jingthut shipor na ki daw ki jingpynkylla ïa ki polisi, ka jingpynmih ïa ki kyndon ban leh ka e-KYC ka pynlong ia ki nongsam ban kynduh jingeh bad kawei na ka jingsaphriang ki jingtip ba ialam bakla ka la wanrah ïa ka jingtieng ia ki paidbah ba pyndonkam kaba la ktah na ka jingkylla ia ki rukom sam ha ka por ba lyngkot.
La iathuh ka jingpynbiang ia ki LPG dosmestic hapoh ka ri ka la nangbiang hadien ka 24 tarik u Lber ban pyndap ia ka jingdonkam ki paidbah. Ka ophis ka kwah ban pynshai halor ki Commercial LPG ka dang don ha ki jingduna namar ka jingbuh kyndon (cap) ka Ministry Petroleum bad Natural Gas. Ka Sorkar Meghalaya ka la shimkhia ia kane kam bad dang wad ki lad ban pynkiew pynlait ia ka jingduna katkum ki jingdonkam ka Jylla.
Katkum ka jingtip la iathuh hapdeng ka 25 bad 27 tarik u Lber, la pynpoi haduh 22,094 tylli ki tyndong LPG ha Jylla na bynta ka jingdonkam kaba long 7,300 haduh 7,400 tylli man ka sngi. Ka jingpynpoi mar ka la nangkiew da kaba pynbun haduh 30 tylli ki trok ha ka shisngi. Ka jingpynbiang LPG na ka bynta ka kam khaii ruh ka nangkiew suki suki, da kaba pynbiang 190 haduh 200 tylli shisngi, la buh hakhmat na bynta ki bynta kiba donkam kane ka pyni ka jingwan poi LPG ka nangbun ha jylla.
Kumta la kyrpad ia ki paidbah ba kim dei ban tieng bad kim dei sngap ia ki khubor hamsaia khlem da wad ia ki jingshisha. Na ka bynta ki jingïarap ne jingpynshai, ki nongshong shnong ki lah ban phone ha ka ophis Directorate’s Tollfree No. 1967.