Plie u MR ia ka “Mission 1000 days” ban ioh jingbam tei met ki khynnah

U Myntri Rangbah ka jylla u Conrad K Sangma hynne ka sngi, ula plie ia ka “Mission 1000 days” ban kyntiew ia ka rukom sam jingbam tei ia ki khynnah.

Kane ka prorkam ka dei ka sienjam ba la shim da u Myntri Rangbah, ia kaba la pyntreikam da ki tand bapher hapoh ka Meghalaya Human Development Council ryngkat bad ka Departments of Social Welfare, Health & Family Welfare, Community & Rural Development (MSRLS/SRES), Education, bad Planning.

Haba kren ha ka jingialang kaba la pynlong ha State Convention Centre Shillong, u Conrad Sangma ula ban jur ba kane ka sienjam ka dei shibynta jong ka jingpyrshang ban shimkhia ia ki mat ba kongsan ba ki paidbah kin ioh jingbam tei met ha ka jingim ban ioh ia ka jingkoit jingkhiah ha ka jingim.

“Ha ka por ba nga shimti ia ka kam ha u 2018, kawei na ki mat kaba nyngkong eh kaba nga sngewkhia bha kadei ka jingbun ki Kmie ba iap ha ka por kha khun ha Meghalaya. Kane kam pynkhuslai tang ia nga hynrei ia ka kynhun baroh kawei, bad ngi larai ban leh kat kaba lah ban pynduna ia kane” la ong u Myntri Rangbah bad ka iathuh ba da ki jingshimkhia bha ia ki sienjam ha kine ki 3 snem kiba la dep la lah ban pynduna bha ia ka jingiap ki kmie kiba punkhun kaba la jan kot ia ka 50%.

“Ngi la pyrshang ban pynbeit ia 60-70% na ki jingeh kiba hakhmat eh, kiba lah ban wanrah ia ki jingpynbha kaba iar ia ki jingtynjuh ki bapher bapher” ula ong ba ka bynrap ba, ka jingshimkhia ia kine ki mat ha ki kyrdan kan lam sha ka jingpynbha kaba iar ha baroh ki liang, wat lada kane ka jingtynjuh ka long kaba jwat.

Halor ka mishon 1000 sngi, u Myntri Rangbah ula pyntip ba T.217 klur la dep ban bhah na ka bynta kane ka prokram kaban ai jingkyrshan ia ki Kmie, ki jingbam kiba tei, jingai jinghikai pynsngewthuh bad ia ki tiar kiba donkam na ka bynta ki khunlung kiba dang shu kha bad ia ki kmie.

Ula banjur ia ka jingdonkam ia ka jingiatreilang bad kyntu ia baroh kiba donbynta lang ha ka kam ban noh synniang lem. Kane ka Mishon kan ym seisoh tang da ka jingpyrshang jong kawei ka tnad ne riewshimet. Ka donkam ia ka jingiashimbynta lang jong baroh na ka imlang sahlang baroh akwei” la pynkut u Conrad.