Ki paidbah riewngeit Khristan ka jylla bad kylleng satlak ka pyrthei hynne ka sngi ki la rakhe ia ka sngi ba kyrpang ba la tip kum ka sngi mihpat u Trai Jisu ne ka ‘Easter Sunday’.Katkum ka jingngeit ki paidbah riewngeit Kristan, kane kadei ka sngi ba kmen namar ba u Trai Jisu u la mihpat na kaba iap ha ka sngi ba lai.Ha ka sngi Good Friday u Jisu Khrist ula shah sah narphna na bynta ki pop jong ki briew, hynrei ha ka sngi ba lai u Jisu ula mih pat na kaba iap.
Ha kane ka sngi ki shakri u Blei ki la kren halor ka jingmut jong kane ka sngi mihpat u Jisu. Ka sngi mihpat jong u Jisu ka long ka sakhi ba la map ia ki pop jong ngi, la pyllaitluid na ka jingpang jingshitom, ka jingsheptieng bad kaba donkam ia ki briew mynta ka long tang ban don ka jingngeit baskhem ha u Blei.“Ka sngi Good Friday kadei ka sngi ba shah iap ban siewspah ia ki pop jong ngi bad ka sngi mihpat kadei ka sngi ba la pynshisha ba ladep siewspah ia ki pop jong ngi,” la pynshai ki shakri u Blei.
Ka khubor ba bha ka long ba u Jisu ula mihpat na ka jingtep bad kum ki briew ruh kaba donkam ka long ban im ia ka jingim ba thymmai bad u Blei.Ki khristan ba jop, kidei kito kiba ngeit bad pdiang ia ka jingaiei kaba u Blei ula ai.