Ki nongshong shnong ka shnat Raid Tynring, ki la ong ba ka jingjied sordar shnat Raid Tynring tang da ki 17 kur, ka la pynsuba ba don eiei sha lyndet bad la kynnoh ba don ka jingiadie iathied jaka beain.
Ka kong Phriensibon kharmuti, u bah Oshalson Nongbri, bad u bah Macdonald Mylliempdah haba kren sha ki lad pathai khubor hynne ka sngi, ki la sei madan ia ka RTI ba la lap ba ka la don ka jingiadie iathied jaka jong ka shnat Tynring, khlem ka rai ka Dorbar, khlem da ioh ia ka NOC na u Syiem bad na ka KHADC.
Ki la kynnoh ba kane ka jingjied Sordar tang da ki 17 kur, ka long tang ban tap eit miaw ia kiei kiei ki kam bamsap haba iadei bad ka jingiadie ia ki jaka jong ka shnong shnat Raid Tynring.
Katkum ka jingong u bah Nongbri, la kynnoh ba ka la don ka jingdie beain ia ar tylli ki jaka jong ka shnat Raid tynring, kawei ka jaka kaba 50 akar bad kawei ka jaka kaba 35 akar.
U bah Nongbri ula ong ba ia ka jaka kaba 50 akar la die sha ki briew shimet ym sha ka tnad sorkar, kumba la rai ha ka Dorbar ba long ha u snem 2022.
“ Ia ka jaka kaba 50 akar la die sha u riew shimet ha ka dor kaba T.54 klur kaba long 250 shi sq ft,” la ong u bah Nongbri bad la kynnoh ba na kane ka pisa u bah Warding ula sam tang mar T.2 lak tam ka pisa sha ki 500 ngut ki longiing kiba dei ban ioh bynta.
“ Ha ka jingshisha na kane ka pisa, u bah Warding ula dei ban sam mar 10 lak hynrei u la sam tang mar T.2.5 lak,” ong u bah Nongbri.
Shuh shuh ki la iathuh ba u bah Wardington ula die ia kane ka jaka kaba 50 akar la die naduh u 2022, katba ia ka pisa la sam paidbah ha u 2025 ha shwa ban jied ia u sordar ba pyniaid da u Warding ban jied da ki 17 Kur.Katba ia kawei ka jaka kaba 35 akar, ka Dorbar shnat Tynring ka la ioh ia ka pisa kaba 50 percent.
“ Ia kane ka jaka la die khlem ka NOC na u Syiem bad na KHADC bad la die sha u Briew shimet ha ka dor 250 shi sq ft,” ula ong.
Ki la pynpaw ka jinglynngoh ba ka pisa kaba ki die ia ka jaka kaba 35 akar, ki paidbah kim pat ioh ia ka pisa. “ Shaei ka jah ka pisa, kane ka la pynlyngoh ia ngi ki nongshong shnong Tynring,” ula bynrap.
Na ka liang ki nongshong shnong Tynring ki la Ki la kynnoh ba u bah Warding ula pynkhein ia ka ain jong ka District Council kaba la kdew shai ba ia ki jaka raid ym lah ban die khlem ka jingbit ka Council.Na ka liang kine ki nongshong shnong ki la rai ban phah jingthoh sha District Council bad kin iaid ruh da ki lynti ka ain .