Ki pulit ka East Khasi Hills ki la kem ia uwei u briew ba la ithuh kyrteng u Kenedy Khongsit 32 snem, halor ka jingkynnoh donkti pyniap ia u heprit Kyrshanbor Kharmudai 7 snem ha Nongrah Lummyrboh, East Khasi Hills.
Kum ban pynkynmaw u heprit Kyrshanbor ula jah rngai na iing ha ka 8 tarik Risaw 2025 bad ia ka met la lap ha ka step ba bud 9 tarik Risaw na Mawpat Lumrumnong.
U Superintendent of Police (SP) East Khasi Hills, u Bah Vivek Syiem ula iathuh ba u heprit ula shah pyniap ha ka por 2:30 haduh 3 baje janmiet ka 8 tarik Risaw 2025 ha ka iing sah jong u Kenedy Khongsit kaba don mar pyrshah bad ka iing u heprit.
U Bah Vivek ula iathuh ba u heprit u don ha iingsah jong u bad u dang peit TV bad ha kane ka por u Khongsit ula bthah ïa u heprit bad leit shim brut bad borti namar ba u dang sait syntek.
Ula iathuh namar u heprit um treh ban leit shim brut bad borti, u Kenedy ula bitar haduh ban ban shim ia ka jingim u heprit bad thep hapoh ka syntek.
“U la thep ia ka metiap u heprit ha ka byrni plastik bad ula kit ia ka met da ka Scooty ronglieh ba don ïa u number ML 04 9622 bad leit bret sha khlaw Mawpat ha ka por 4:40 janmiet” la ong u SP.
U SP ula iathuh u runar u dei uba donkti ban shoh briew bad ïa kane la pynthikna da ka kurim barim kaba la phla ba ula shoh bad sangah ia ka ha ka kynroh.