Ka Confederation of Meghalaya Social Organisations (CoMSO) hynne ka sngi ka la pynpaw ba ki pdiang ia ka jingkren jong u Myntri Rangbah ka jylla u Conrad K Sangma uba la kyrshan ban pyntreikam ia ka Special Intensive Revision (SIR) ha ka jylla, hynrei ki kwah pat ba kane ka jingkren kam dei ban kut tang ka ktien, khlem da pyni ia ka kam.Haba kren sha ki lad pathai khubor hynne ka sngi hadien ka jingiakynduh ia u State President ka BJP u Rikman Momin ha ophis treikam ka party, u Chairman ka CoMSO u bah Roy Kupar Synrem ula ong ba ka seng ka khmih lynti ba ka sorkar jylla kan shim ia ki lad ki lynti ban pyntikna ba ka SIR dei ban pyntreikam kloi ha ka jylla.“Ngi ai khublei bad ngi pdiang ia ka jingkren jong u Myntri Rangbah ula pynpaw ba ka sorkar ka kyrshan ban pyntreikam ia ka SIR. Hynrei ngim kwah ba ka sorkar kan shu bishar bniah sah ia kane bad kam dei ban shu ong tang da ka ktien, khlem leh pat ia ka kam,” ong u bah Roy.
Ula kyntu ia ka sorkar jylla ba kadei ban iakren bad ka sorkar pdeng bad ka Election Commission of India (ECI) ban pynsted ia ka jingpyntreikam ia ka SIR ha kane ka jylla.U bah Roy ula ong ba ka CoMSO ka la rai ban iaid shakhmat ban dawa ban pyntreikam ia ka SIR bad ban wanrah ia ka jingpynkylla ha ka ST Order, 1950.Ka COMSO ka la rai ruh ba kan sa leit ban ai jingthoh sha baroh ki seng sain pyrthei ha kane ka jylla ban pyntip ia ki, ia ki mat jingdawa ba ki la buh hakhmat ka sorkar. “Ngin sa leit ban buh jingthoh sha baroh ki seng sain pyrthei ban pan ka jingkyrshan bad kyntu ba kum ki nongialam ba ki paidbah ki la jied, kidei ban shim lang ia ka jingkitkhlieh,” ula ong. Katkum ka jingong u bah Roy, na ka liang u President ka BJP ula pyntikna ba na ka liang jong ki ruh ki la iakren bad ki ladep ban thoh sha ki bor ba dei peit.
Haba ia dei bad ka ST Order, 1950, ka CoMSO ka la pynpaw ka jingsngewkhia halor ka jingslem treikam ki Working committee ba la thaw da ka sorkar.Ula ong ba ia kane ka committee la thaw ha u bnai Nohprah, 2024 ban bishar bniah, hynrei haduh mynta ym shym la iohi eiei. “Ka sorkar ka kloi ban thaw ia ka committee, hynrei kine ki committee, ki shim por da ki snem ban pyndep ia ka kam namar haduh mynta yym shym la iohi eiei,” ula bynrap.