Sdang nyngkong eh ka Shad Paskha ha u 1971 da u missionary na Italy

U snem 1971 ulong u snem ba khraw ban sah kynmaw ha ka histori jong ka Shad Paskha ne ka ‘Easter Dance’, kaba la sdang nyngkong eh da u missionary na Italy, u Fr. Nicholas Tuligi, katba u dang long u Parish Priest jong ka Parish Pynursla.
Naduh kane ka por, kane ka rukom shad ka la saphriang sha kiwei pat ki parish, kynthup ha ka Parish Pynthorumkhrah, kaba dang shen ka la pynlong ia kane ka jingshad kaba sien pynlong kaba
ar ha St. Joseph Higher Secondary School, Pyn-thorumkhrah ha kaba ki don palat 250 ngut ki nongshad kiba kup ba phong da ki jain shad tynrai khasi ki la shim bynta, ryngkat ka jingiphuh jingphieng bad ka mynsiem kaba kmen ban ainguh ia U Blei.
Haba kren sha ki lad pathai khubor, u Chairman ka Pynthorumkhrah Parish Paskha Committee, u Bah B. Nongbri, u la ong ba ka Shad Paskha kam dei tang ka jingshad, hynrei ka long ka dak ka jingngeit bad ka jingtylli hapoh ka imlang sahlang.
U la ban jur halor ka jingdonkam ban pynneh pynsah ia kane ka riti dustur.
U Bah Nongbri u la batai shuh shuh ba kane ka jingshad ka long ban kynmaw ia ka jingmihpat U Khrist, da kaba kdew ia ka khubor na ka Gospel u Mathaios (Lynnong 5, Dkhot 17), ha kaba U Jisu u la ong ba u wan ym ban pynduh ia ka ain hynrei ban pyndep ia ka.
Kane ka jingrakhe ka la wallam lang ia baroh ki riewngeit baroh bad ka pynskhem ia ka khubor ka jingkyrmen, ka jinglong thymmai, bad ka jingtylli.
Ka Shad Paskha ka pynpaw ia ka jingshongkun bad ka jingngeit ki bangeit, ban kynmaw ia ka jingmihpat U Jisu Khrist na ka jingiap.
Ka Shad Paskha ka pyni ia ka jingainguh kaba khraw bad ka jingkmen hapdeng ki ba ngeit ha U Trai uba la mihpat. Ka pyni ruh ia ka jingphuh jingphieng ka dustur ki Khasi, kaba iatylli lang bad ka jingngeit bad ka jinglong tynrai.
Ia kane ka jingshad nyngkong eh la wanrah kum ka rukom ainguh kaba kmen hapoh ka jingngeit Katholik, ban sakhi ia ka jingiap bad ka jingmihpat U Khrist bad hadien kane bud ia ki riti dustur bad ki jinglong kiba tynrai.
U Fr. Tuligi ula iohi lypa ba ka Shad Paskha kan long ka lynti ban pynneh bad ban rakhe ia ka jingriewspah ka ktien Khasi, ka riam ka beit, bad ka riti dustur.
Ula ai mynsiem ia ki briew ban pynneh ia ka jinglong tynrai bad ka jingsngew sarong ia la ka riti dustur.