Plie u Myntri Sorkar ïa ka surok thymmai hajan NEFA Secretariat

U Myntri ka Sorkar Jylla u Bah Sanbor Shullai uba long ruh u MLA ka South Shillong Constituency, ha ka sngi Saitjain ula plie paidbah ia ka surok kaba thymmai kaba hajan jongka NEFA Secretariat kaba hap ha Cantonment Area.
Ia kane ka surok kaba don ia ka jingjrong kaba 0.185 Km la tei ha ka jinglut jingsep kaba kot T.3,36,18,000 ban pynsuk ia ka leit ka wan jong ki kali ha ka nongbah Shillong khamtam ha kaban ialeh ban pynduna ia ka jingdheng kali ha ka thaiñ Anjalee.
Ha kane ka jingplie ia kane ka surok thymmai ne ka Link Road la iadonlang u Executive Engineer ka Shillong Central Division u Bah S Lytep, ka Deputy Residents Commissioner jong ka Arunachal Pradesh ka Rani Mibang, ki nongialam shnong bad ki nongshong shnong ka thaiñ Laban bad kiwei kiwei.
U Bah Sanbor ula ong ba kane ka surok kadei kaba la shna da ka jingiohi jngai jong ka sorkar MDA hapoh ka jingialam jong u Myntri Rangbah ka jylla u Conrad Sangma bad u Symbud Myntri Rangbah u Bah Prestone Tynsong ryngkat bad u kum u MLA ka thain ban pynsuk ia ka leit ka wan ki paidbah khamtam ha kane ka jaka kaba dei kaba ki iaid ki bun bha kiba iaid naduh step haduh miet.
Ula ong, ba kane ka surok kadei shi bynta jong ka Asian Highway (AH) kaban pyniasoh ia ka jylla Meghalaya bad ka ri Bangladesh lyngba ka Shillong-Tamabil Road bad u kyrmen skhem ba da ka jingplie ia kane ka surok kan ai jingmyntoi ia ki nongshong shnong.