Na u CEM dawa ka HYC bym dei ban pynthymmai ïa ki laisen bar jylla

Ka Hynniewtrep Youth Council (HYC) West Khasi Hills hynne ka sngi, ki la dawa na u Chief Executive Member (CEM) ka KHADC ba ym dei shuh ban dang pynthymmai ia ki Trading Lisen jong ki bar jylla ha Iew Shahlang. Ha ka jingiakynduh ia u CEM u bah Winston Tony Lyngdoh, ka seng ka la aiti ruh ia ka dorkhas ban ujor halor ka jingjyllei ki bar jylla kiba shong dukan ha lew Shallang. Haba kren sha ki lad pathai khubor, u bah Lumlang Kharsyiemlieh u President ka HYC WKH, ula ong ba dang shen ka seng ka la pyllong ia ka jingkhynra ha Iew Shallang bad ki la lap ba ki don palat 180 tylli ki dukan ba shong beain khlem ka trading lisen bad kumba 98 percent ia ka khaii pateng la bat da ki bar jylla ha katei ka iew.

Ka seng ka la pynpaw ka jingsngewsih ba ha West Khasi Hills District, ki bar jylla ki ioh rung ban kamai kajih bad ban khaii pateng laitluid. Ula ong ba hapoh West Khasi Hills District la ka dei ha lew Rambrai, lew Maweit, lew Riangdo, lew Nonglang bad kiwei khamtam wat lew Nongstoin kaba dei ka iew heh, ki briew trai ri, ki la lah ban bat ia u lakam ka Khaii pateng. Katkum ka jingong u bah Lumlang, na ka liang u CEM ula ong ba ka EC ka ladep ban ai ia ka jingpyntip ne ka Notification sha ki Dorbar Shnong, ki Syiem ba kim dei ban ai NOC sha ki bar jylla bad u la kular ruh ba un sa pynkhreh ia ki pulit Enforcement ba khlain ban leit khynra ha Shallang.

“U CEM ula kren shai ba ka EC kan wad ia ki lad ki lynti ban pynbeit shwa mynta katno ngut kiba wan aplai bad pynthymmai ia ka Trading Lisen bad hadien kane kin sa hiar sha Iew Shallang ban khynra ia ki mynder,” ula ong. Katkum ka jingong u bah Lumlang, ban hiar ha Iew Shallang ban leit tang kumba 10-20 ngut ki pulit Enforcement, kam dei ka kam ba suk namar ka seng ruh dang shen ka la hiar da ki spah ngut tam, hynrei la iohi ba ki dang bun ki bar jylla.