Ryngkat ki nongialam ka CBCI iakynduh u MR ia u Myntri sorkar pdeng ia ka jingthmu pyntreikam ia ka FCRA Amendment Bill ban khang bei pisa na shabar ri ia ki kynhun Khristan

U Myntri Rangbah ka Jylla u Conrad K Sangma ryngkat u Symbud Myntri Rangbah u Bah Prestone Tynsong bad ki nongialam ka Catholic Bishops’ Conference of India (CBCI) hynne ka sngi ki la iakynduh ia u Myntri ka Sorkar Pdeng uba khmih ia ka Minority Affairs u Kiren Rijiju ha Nongbah Delhi ban pynpaw ia ka jingsngewkhia halor ka jingthmu ka Sorkar India ban pyntreikam ia ka FCRA Amendment Bill.

Ha katei ka jingiakynduh, ka kynhun na ka sorkar jylla bad ki nongialam niam, ki la pynpaw ki kamram ba kongsan kiba la leh ha ka liang pule puthi, ka koit ka khiah bad ki kam shakri ia ka imlang sahlang ha kylleng ka jylla Meghalaya bad ha ka thaiñ shatei lammihngi baroh kawei khamtam ki jaka kyndong ba sah ki riewlum bad khamtam ba bun na kine ki jaka ki dei ba la kyrshan lyngba ka jingbei tyngka nabar ri, kiba iai bteng ban shakri ia kiba dang sahdien kaba la kyntiew ia ka roi ka par ka thaiñ.

Ki la pynpaw ka jingsngewkhia halor katto katne ki kyndon ba la tyrwa ha katei ka Amendment, khamtam kaba iadei bad ka jingkurup ia ka jingdon jingem ne ka spah ka phew, kaba la pynmih ia ka jingsheptieng hapdeng ki kynhun Khristan bad ki kynhun shakri ia ka imlang sahlang, kumta ki la ban jur ba donkam ka jingiasyllok bad iatai sani ban shimkhia ia kane ka mat.

U Conrad ula ong, “Ngi lah pynpaw ka jingsngewkhia kaba la pynsngew ki kynhun Khristan khamtam ban kurup ia ki jingdon jingem bad ban jur ba donkam ka jingiatai bad iamir jingmut biang ia kane ka mat” bad bynrap da kaba ong, “Ki jaka shakri ba la kyrshan pisa nabar ri ka dei ka bynta ba la wanrah ia ka jingkylla ba khraw ha ka jingshakri ha ka pule puthi, ka koit ka khiah bad ka jingshakri ia ka imlang sahlang ha ki jaka kyndong ba sahdien ha Meghalaya bad ha ka thaiñ shatei lammihngi”.

U Conrad ula pyntip ba u Myntri ka Sorkar Pdeng u Kiren Rijiju ula shah shkor bha ia ki mat ba la pynpaw bad ula pynthikna ba yn sa khmih bniah ia kine ki mat ba la pynsngew bad ula pynthikna kan don ka jingiasyllok bad baroh kiba don bynta ha shwa ban shim ia ka rai ba khatduh ban pynkylla ia ka Amendment.

“Nga lah ioh ia ka jingai mynsiem na ka jingkular u Myntri ka Sorkar Pdeng u Kiren Rijiju ba yn sa pynlong ia ka jingiamir jingmut bad un bishar bniah ia ki jingsngewkhia shwa ban shim ka rai ba khatduh” la ong u Myntri Rangbah.

“Ngi don ka jingkyrmen lyngba ka jingiakren bad iamir jingut, kan long ka lad ban iada ia ka hok ki kynhun rit paid bad ki jingdon jingem jong ki” la ong u Conrad.

Ka kynhun ka la ban jur ban pynrung ki kyndon ban iada ha ka jingthaw ia ka aiñ bad ka jingai jingshakri kan iaid bteng ryngkat ka rukom treikam bad ka jingkhein jingdiah kaba khuid.

Ki la pynpaw ia ka jingdonkam ban iada ia ka hok bad ia ka rukom treikam jong ki kynhun niam bad ia ki kynhun trei mon sngewbha na ka bynta ka bha ka miat jong ka imlang sahlang.

Ha kane ka jingialang nalor u Myntri Rangbah bad u Symbud Myntri Rangbah la ia donlang ruh u President ka CBCI Eminence Anthony Cardinal Poola bad u Secretary General u Most Rev Anil Joseph Thomas Couto bad kiwei ki nongialam ka CBCI.