Pyrshah ka MEMRIWU ban ai ha ki kompani shimet ia ki 108

Ka Meghalaya EMRI Workers Union ka la dorkhas ha u Myntri ka Koit ka Khiah u Bah Wailadmiki Shylla ban pyrshah ia ka jingkhot tender ban ai ha ki kompani shimet ban pyniaid ia ka 108 bad ka la dawa ia kane ka jingai jingshakri ba kongsan dei ban pyniaid hi da ka Sorkar Jylla ne da ka National Health Mission (NHM).

Katkum ka dorkhas ka Meghalaya EMRI Workers Union kala pynpaw ba ia kane ka jingai jingshakri ia ki paitbah kala sdang naduh u snem 2008 bad mynta kala kynjoh sha ka 16 snem bad kane ka jingai jingshakri ka long kaba kongsan bha ia ki nongshong shnong khamtam ia kito kiba pang ba shitom bad ia kiba mad ia ki jingjia aksiden ha ka jylla.

Ka Meghalaya EMRI Workers Union kala pyrshah jur ia ka jingkhot tender biang ban aiti sha ka kompani shimet ban pyniaid ia kane ka jingai jingshakri bad kala ong ba hadien ka jingsakhi ia ka rukom treikam kaba sniew jongka GVK Company ban pyniaid ia kane ka jingshakri, kala pynlong ia ki nongtrei bad ki nongshong shnong ban pynlong ia ki jingiakhih ha ki snem kiba la dep bad kala ktah jur ia ki jingai jingshakri kyrkieh ia ki paitbah ha ka por ba ki mad ia ki jingjia aksiden.

“Ngi lah sakhi ia ki jingleh kiba sniew ha ka por jong ka GVK, naduh ka jingsumar ka jingbym don ia ka jaka ban shna ne maramot, ka jingbym lah ban maramot ia ki kali kit nongpang ne Ambulance ha ka por, ka jingduna jong ka jingdon ki nongtrei, ka jingduna ha kaban pynbiang ia ki tiar sumar, ka jingbym buh lypa ia ki tiar kiba donkam bad kiwei kiwei” la pynpaw ha ka dorkhas.

Ki la pynpaw ba ka jingpyniaid ka GVK kala long kaba sniew bha hynrei haba la pyniaid pat da ka NHM kala rukom pyniaid kala long kaba bha bad kaba iaid ryntih bad kim shim la mih ruh kino kino ki jingeh.Namar ba kane ka jingai jingshakri ka long kaba kongsan bha bad kadei kaba bei tyngka hi da ka sorkar, kumta ka long kaba iahap bha ba ka sorkar kan shimti ban pyniaid hi noh dalade.

Ka Meghalaya EMRI Workers Union kala pynpaw ba ka jingkhot tender ia ki kompani shimet kan lam tang sha ka jingbamsap bad ka jingaiti ban pynkylla sha ka kynhun shimet. Kumta dei ban pynkut noh ia ka jingkhot tender bad ban pdiang ia ka jingtyrwa ban ithuh pura noh ia ka jingai jingshakri jong ki nongtrei na ka bynta ka bynta ka miat bad ka jingmyntoi jong ki paitbah hapoh ka jylla.

Ka Meghalaya EMRI Workers Union kala pynpaw ruh ia ka jingpyrshah kaba jur halor ka jingioh jingtip ba ka sorkar kaba la rai ban aiti lyngba ka Sub-Tender sha ka “Shishupal Agency” ban thungkam ha ka 108 Emergency Response Services bad kala dawa ba dei ban thungkam beit beit da ka sorkar ne da ka NHM da kaba pynbna paitbah khnang ba ki nongshong shnong kiba la don ia ki kyrdan kin ioh ia ka lad ban shakri ha ka kam kaba kongsan tam ha ka jylla.