Bat ka KSU ia u bar jylla ba jrong kti ia ka samla ba leit thied dawai

Ka KSU Laitumkhrah Unit hynne ka sngi ka lah ioh ban bat ia uwei bar jylla, uba la jrong kti ia kawei ka samla kaba leit thied dawai. Katkum ka kyrwoh na ka seng, une u bar jylla la tip kyrteng kum u Bulu Malakar uba dei napoh Assam Karimganj District uba sah hapoh Laitumkhrah New Colony uba shu trei tang kum u nongdie jingdie  hynrei uba kam ba u dei u Pharmacist na kawei ka Pharmacy kaba kyrteng ka Meghalaya Pharmacy kaba don ha Laitumkhrah.

Ha ka kyrwoh ka seng, ka la ong ba kane ka la jia ia iwei i Samla Kynthei iba leit thied dawai na ka bynta ka jingmong ka shyntur hynrei la iathuh ba une u bar jylla u la khot ia i shapoh ka kamra jong u clinic doktor da kaba ong ba donkam ban pynthew BP  bad nangta u la phah  thiah ia ita i samla ha jingthiah bad leh mynleh ban eksamin ia ka  ha kata ka por hi u lah jrong kti ia kane ka samla bad la ktah iaka sha ki bynta bym dei ban ktah, bad ha kajuh ka por u la pynhap ia u chain patlun u jong ka da kaba thmu ban leh jubor iaka bad mar hangta ka  lah kyndit bad khie  joit bad mareh nangta na pharmacy .

Shuh shuh la ong ba na ka liang kane ka Samla ka la pyntip mar mar sha ki dkhot ka seng bad ha ka jinsynran lang jong ki seng samla shnong Laitumkhrah pyllun bad ha ka jingdon u Secretary dong ka Upper New Colony, mar mar ki la rah ia u sha Laitumkhrah Police Station. Halor kane ka jingjia,  na ka liang ka iing ka sem ryngkat ka seng bad ka shnong hi ka la ai jingujor bad kumjuh ruh sha women’s commission pyrshah ia une u bar jylla bad la shaniah ha ki bor pulit ban leh ia kaba donkam. Ka seng bad ka shnong hi ka la khang khyrdep syndon ia kane ka Pharmacy bad ka maham ruh ban pynshitom ia kum kine ki briew da kaba tyngeh.