Baroh 60 tylli ki Constituency theh kam pynroi ka MDA hapoh ka jingïalam ka NPP

U Symbud Myntri Rang-bah ka Jylla u Bah Sniaw-bhalang Dhar uba long ruh u MLA ka Nartiang, ha ka sngi Saitjain, ula ong ba ka Sorkar Synroplang Meghalaya Democratic Alliance (MDA) hapoh ka jingialam ka seng NPP kala theh ia ki kam pynroi ha baroh ki 60 tylli ki Constituency jong ka jylla bad kam shim la leh shilliang khmat wat ia ki Constituency kiba la mihkhmat da ki MLA na ki seng saiñ pyrthei kiba don ha ka Liang Pyrshah ne ‘Opposition’. Haba kren ha ka jing-ialang ha ka jingplie ia ki projek bapher ha ka shnong Wahiajer, West Jaintia Hills District, u Bah Sniawbhalang ula ong, ba ka sorkar MDA hapoh ka jingialam u Myntri Rangbah Conrad K Sangma, kala pyniar ia ka roi ka par ha baroh 60 tylli ki constituency wat ha ki constituency kiba la mihkhmat da ki MLA na ka Liang Pyrshah bad kam don wat tang kawei ka constituency kaba la shah ieh shadien.

Ula iaroh ruh ia u Symbud Myntri Rangbah u Bah Prestone Tynsong halor ka jingpyniaid shakhmat ia ki jingtei ki bapher bad ong ba u dap da ka jingsngewsarong ban don ia u Bah Prestone Tynsong uba khmih ia ka PWD ha kine ki 8 snem kiba la dep. U Bah Sniawbhalang ula pynpaw ba jingthmu ban shna ia ka surok na Lad Umroi-Silchar kadei kawei na ki projek kaba kongsan bha bad kane projek kadei kaba heh ha ka ri kaba palat ia ka T.21,800 Klur ban shna ia ka surok na Lad Umroi shaduh Silchar bad ula ong ba shen u Myntri Rangbahduh ka ri yn sa wan buh ia u mawnongrim na ka bynta kane ka projek.

Ula pynshai ba mynshwa, ka tnad jngohkai ka ju ioh ia ka mang tyngka kaba T.20 Klur hynrei naduh ba ka sorkar MDA kala wan ha ka bor, kaba duna eh kadei da ki hajar klur kiba la bhah na ka bynta kane ka tnad man la ka snem bad ka Mang Tyngka ha u snem 2018 ka long tang T.9,000 Klur bad hapoh jong ka 8 snem kala kiew sha ka T.32,000 Klur bad ka ong “Namar ba kane ka sorkar ka treikam. Ngi ngim don ia ka por ban pynleit jingmut ia kito kiba kynthoh ia ka sorkar, namar ngi bunkam ban shakri ia ki paitbah bad ia ka jylla. Lada ka sorkar kam trei ia ka kam, ki paitbah kin ym iohlad ban kynthoh eiei ia ngi. Ki briew ki kawang maw tang ia u dieng uba mih ki soh”. U Symbud Myntri Rangbah ula iathuh ruh ba ka Sorkar kan dang wanrah ia ki projek kam pynroi kiban kot da ki klur tyngka ha ka jylla baroh kawei bad ka jylla kan pynlong ia ka National Games ha u snem ban wan.