Dawa ka VPP ban pynurlong phra tylli ki mat ha shwa ba kin tur paidbah.

Ka Voice of the People Party hynne ka sngi ha ka jingialang paidbah ba long ha Motphran, ka la buh hakhmat ia ki phra tylli ki mat jingdawa ba ka sorkar ka dei ban shimkhia ban pynurlong mardor ha shwa ba kin tur paidbah bad kin pyllong ia ka jingiakhih ba jur.

Kine ki phra tylli ki mat jingdawa ki long ba kadei ban sahngeh ban niohbein ia ki nonghikai bad kadei ban weng noh ia ka jingbthah ba ki nonghikai kiba la hikai slem ha kam kidei ban iakhun ia ka eksam MTET bad dei ban weng noh ia ka Meghalaya Private College Act, 2025 kaba ktah ia ka jaka ai jinghikai bad kam dei ban pyndonkam ia ki nonghikai ha ka kam thoh Census bad kam ilekshon.

La dawa ba dei ban sangeh mardor ban pynjlan kam ia kiba la shongthait namar kane ka khanglad ia ki samla kiba dei ban ioh kam iohjam. Ka sorkar kadei ban pyntikna ban wanrah ka thungkam thungjam kaba khuid ha DSC bad MPSC ba kino kino ki dkhot kim dei ban don jingiadei ba iajan bad ki seng ba synshar ha ka sorkar kynthup ka seng NPP, UDP, BJP.

Ka VPP ka la dawa ruh ba ka sorkar kadei ban sahngeh ban aiwai ia ki jaka paidbah, ki jaka Raid sha ki kompeni ne sha ki riew shimet bad kam dei ban iaid lait ia ki Autonomous District Council haba iadei bad ki jaka puta.

Shuh shuh ki la dawa ba ka sorkar kadei ban iada ia ki briew ha Khappud bad kadei ban pynkhlain ia ki bor pahara ha ki shnong khappud, ban tohkit ia ki briew kiba rung beain ha kane ka jylla.

Ka mat jingdawa ba khatduh ka long ba ka sorkar kadei ban pynsangeh bad khang mardor ia ki jaka thang dewiong bad ki karkhana dewbilat thymmai.