Thung kam u Najir ha SAD ia kiba iadei khlem interview: KHNAM

Ka Khun Hynniewtrep National Awakening Movement (KHNAM) ka la ong ba ka jingdon ka jingthung kam sop sop ha ka tnad Secretariat Adminitrative Department Nazarat (SADN), la lap lyngba ka Right To Information (RTI).Ia kane ka KHNAM ka la pynshai hadien ba ka kynhun Meghalaya Secretariat Progressive Employees Union (MSPEU) ka la kyntait ba don ka jingthung kam sop sop ha kane ka tnad.Haba kren sha ki lad pathai khubor, u bah Thomas Passah ula pynshai ba dang shen ka seng ka la iakynduh ia u Chief Secretary ka jylla ban kdew ia ka jinglap jong ka seng lyngba ka RTI ba don ka jingthung kam Daily Wages ha ka tnad SADN.

U bah Thomas ula pynshai ba ki don ar jait ka rukom thep kam ha SADN kaba nyngkong ka long lyngba u Najir ka SAD bad lyngba ka telephone ban khot trei khlem don ka Advertisment. Ula bynrap Ia kine ki nongtrei ba la pynrung kam lah ban beh da u Najir hi.“Kaba sngewsih ka long ba ki don katto katne ngut kiba la trei la slem bha hynrei ki shah beh kam noh namar uwei u briew u shun ia ki bad uwei pat um sngewtynnad shuh ia ki,” ong u bah Thomas.U bah Thomas ula ong ba ki don ki kam ba sah thylli ha katei ka tnad bad kane ka tnad ka pynmih ia ka jingpynbna laitkam hynrei ka thep kam pat kontrak.

Ula ong ba lyngba ka RTI, ka seng ka la lap ba ki don ki briew ba la thung ha kane ka tnad, ki dei ki bahaiing jong ki katto katne ngut kiba trei ha SADN. Hynrei ia ki kyrteng um pat shym la kwah ban pynpaw mynta namar ba ula kyntu ia u Chief Secretary ba un pynbeit ia kane ka jingbakla. Namarkata ula kyntu ba ka jingpynrung kam kadei ban long shai khnang ba ym lah beh bad pynrung kam katba mon.