Thmu ka sorkar ban pynkylla ia ka Bond ba ki doctor kin wanphai ha Jylla

Ka Sorkar Meghalaya ka dang wad ia ki lad lynti ban wanrah jingkylla ha ka jingiateh bad ki samla pule doctor naka bthah Sorkar (Medical Bond Policy) ban pynthikna ba ki Doctor kin wan phai biang ban shakri hapoh ka Jylla.Kane ka long namar ba ka Jylla ka don hapdeng ka jingduna ki Doctor ba pytnbit (Specialist) khamtam ha ki thain nong kyndong. Haba pyntip ia kane u Myntri ka tnat ka koit ka khiah u Bah Wailadmiki Shylla u la iathuh ba ka Sorkar ka ju phah ia ki samla pule MBBS man la u snem, hynrei bun na ki, kim ju wanphai shuh ban shakri hapoh ka Jylla khamtam haki thain nong kyndong.

“Nga la shong jingialang ruh bad u Myntri Rangbah ka Jylla bad ka kynhun Myntri Sorkar ha kaba ngi dang wad bniah lada ngi lah ban wanrah ïa ka jingkylla haba iadei bad ka Bond namar ba bun na ki samla kim wanphai shuh ban shakri hapoh ka Jylla khamtam eh lada ki ioh Posting shaki thain nong kyndong” la ong u Bah Wailad.“Dei na kata ka daw, ngi pyrshang ban wanrah ïa ka jingkylla ha ka Bond Policy ha kaba ki samla pule jong ngi kiba dang pule MBBS hadien ba ki la pyndep ïa ka jingpule jong ki, kin wan trei noh shapoh ka Jylla” ula ong.

U Myntri u la kdew ia ka jingkiew ha ka jingpule doctor, ha kaba ka Shillong Medical College ka la sdang ia ka kynhun MBBS kaba nyngkong mynta u snem.“Kumba ka long mynta, phi lah ban iohi ba kyrpang mynta u snem, ngi lah ban sdang ia ka kynhun ba nyngkong jong ki doctor hapoh ka Shillong Medical College” u la ong.