Palat T.32 klur sam jingiarap u Conrad ia ki samla ban sengkam lajong ha Garo Hills

U Myntri Rangbah Conrad K Sangma mynta ka sngi, ula shim bynta ha ka Skillerate 2026 ba la pynlong ha Holly Hock marjan ka Bakdil Training Centre ha Tura ban pynskhem ia ka jingkut jingmut ka Sorkar ban pynkhlain ia ka jingpynroi ki sap treikam bad ki lad ioh kam ioh jam bad ki lad sengkam seng jam ia ki samla ka Jylla.Ia kane ka prokram la pynlong da ka Tnad Labour, Employment & Skill Development ka Sorkar Meghalaya ryngkat ka jingiatreilang bad ka CM Skill Mission bad ka Meghalaya State Skill Development Society (MSSDS).Ha kane ka jingialang la wan shim bynta da u Myntri ka Tnad Labour, Employment & Skill Development Bah Methodius Dkhar kum u kongsan symbud ryngkat u Deputy Commissioner ka West Garo Hills Vibhor Aggarwal, ki Ophisar, nonghikai, ki nongioh jingmyntoi bad ki kynhun ba don bynta ha ki kam pynroi sap treikam.Haba ai jingkren u Myntri Rangbah ula ong, kane ka prokram ka pyni ia ka jingiohi jngai jong ka CM Connect ha kaba ki nongshongshnong ki lah ban pynsngew ia ki jingeh bad ki jingai jingmut ia ka Sorkar. U la ong kawei na ki jingeh kiba la pynsngew da ki samla lyngba ka CM Connect ka dei ka jingdonkam ki lad ha ka jingpynroi ia ki sap treikam, ka jingsengkam da lade bad kyrshan ban ioh kamai ka kajih.

U la ong ka Meghalaya ka la mang palat T.32 klur ha ki prokram pynroi sap treikam bapher bapher kiba ai jingmyntoi ia ki hajar ngut ki samla bad ka shem tang ka jingai jinghikai kam biang satia. “Kiba bun kiba dep ioh jinghikai ki pynpaw hadien la pyndep ia ki jinghikai, kim don ki tiar ki tar ba donkam ban sdang ban trei la ka jong ka kam. Ki mechanic ki lah ban pyndep ka jinghikai hynrei khlem ki tiar bad ki karkhana shna kali ka shem jingeh bha” ula bynrap.Kumta ka Sorkar ka la rai ban ai ki tiar ban kyrshan sengkam ia ki samla ba la pyndep ki jinghikai khnang ba kin lah trei kam lajong. “Ka prokram kam dei tang halor ka jingsam ia ki tiar. Ka dei ruh ban pynioh ka ka jingshaniah ha lade bad ka lad kamai na bynta ki samla” ula kynthoh.Haba phai halor ka jingkiew ka ioh ka kot ka Jylla, u Myntri Rangbah ula ong, ka Jylla ka la ioh ka jingithuh kum kawei na kiba kiew sted ha ka ioh ka kot hapoh ka Ri. Hynrei, ula ban jur ka jingkiew ka dei ban iai long ia baroh ki riew paidbah. “Ka jingkiew ka ioh ka kot kam biang lada ki jingmyntoi kim poi sha ki thliew iing, ki samla, ki nongrep bad man ki nongseng kam lajong” ula pynpaw. U la pynpaw ba kawei na ki jinghikai ba kongsan ka long ba ki jinghikai halor ka sap khlem ka jingkyrshan ka pat biang. “Mynshuwa bun ki prokram ki pynleit jingmut tang ha ki jinghikai, hynrei donkam ki tiar treikam bad pynioh ia ki iew bad ki prokram mynta ki thmu ban pyndap ia ki jingduna” ula ong.

U Myntri Rangbah ula kren halor ka jingiatehlok ka Sorkar bad ki jaka hikai shimet bad ki kynhun ba don bynta ban pynroi ia ki sap. Kana jingiatreilang ki kyntiew ia ki jaka hikai katkum ki jingtreikam ki karkhana ban nang pynbun ki lad na bynta ki samla ka Jylla.Haba ai jingkren u Myntri ka Tnad Labour, Employment & Skill Development Bah Methodius Dkhar ula ong, ia ka jingkongsan ban pyntbit ia ki samla ia ki sap katkum ki jingtreikam ki karkhana ban pynbun ki lad ioh kam lyngba ki prokram ai jinghikai ban pyntbit ia ka sap.“Haba nga ieng hangne ka long jingkmen bad sngew sarong,” ula ong bad bynrap ki jingsngew ki mih na ar tylli ki daw ka burom ban kren ha ka jingdonlang u Myntri Rangbah ha ka constituency jong u bad ka lad ban ïakren bad ki samla ba don sap.Ula ong, “ngam shym iohi ia phi kum ki nongshah hikai, nga iohi ki nong sengkam bad ki nongialam ia ka lawei ban wanrah jingkylla ia ka lawei ka jylla”.Ha kane ka sngi la sam 34 tylli ki work order 4830 ngut kiba shah hikai pyntbit hapoh ka Skill Meghalaya bad Supporting Human Capital Development Meghalaya (SHCDM) kaba kot T.16,59,56,334 bad la sam 28 tylli ki work order ia 3920 ngut ba kot T.12,04,35,044, katba hapoh ka SHCDM la sam ia 6 tylli ki work order ia 900 ngut ba kot T.4,55,21,290. Ka jingpynlut na bynta shikhlieh ki nongshah hikai ka long T. 30,645 hapoh ka Skill Meghalaya bad T.50,579 hapoh ka SHCDM. Kumjuh la sam ia ki tiar ba shongdor T.44,72,289 sha ki 798 ngut ban kyrshan ia ki nongsengkam lajong. Ki tiar kynthup ia ka plumbing, automotive service, gardening, farming, masonry, mobile phone repair bad rep tit.