Ka CM-LEAD kan wanrah ki samla batbit, pyllait u MR 27 ki kali ka tnad pule

U Myntri Rangbah ka Jylla Conrad K Sangma ula shah pynkup burom ha ka All Garo Hills SSA School Teachers Association (AGHSSASTA-CB) ha ka sngi Saitjain kum ka jingithuh ia ka jingpyrshang jongu ban pynkhlain ia ka pule puthi bad shimkhia ia ki jingeh ki nonghikai SSA ka Jylla.

Ia ka jingialang pynkup burom la pynlong ha madan ialehkai ka Matchakolgre LP School ha Tura bad la wan ia shim bynta da ki nonghikai, ki Ophisar ka Tnad Pule, ki nongialam shnong bad ki paidbah na kylleng ka ri-lum Garo.

Ha ka jingialang, u Myntri Rangbah ula pynlait ia ka MBoSE E-Office Management System bad Accounting System, ka digital dashboard ba thmu ban pynjanai ia ka rukom pyniaid ia ka pisa, ka jingtreikam ba shai bad ka jingkitkhlieh ha ka kam pule puthi.

Ula pynlait ruh ia ka Chief Minister’s Leadership in Education and Development (CM-LEAD) Fellowship, ka prokram ban pynwan dur bad wanrah ia ki samla ba tbit ha ka pule puthi ban kyrshan ka jingwanrah ia ki buit treikam thymmai, ka synshar khadar bad jingpyntreikam ki prokram pule ha baroh 12 tylli ki District.

Katkum ka jingong ki heh Sorkar, kane ka prokram ai jingiarap kan pynkhlain ia ki jinghikai ha ki 8000 tylli ki skul ha baroh ka Jylla.

Ha kawei pat ka prokram, u Conrad ula pynlait ia 27 tylli ki kali ban pynkhlain ia ka jingpeit bniah ki Ophisar ba don ha ki lyngkha treikam bad ka iaid ka ieng ha kylleng ki District.

Haba kren ha ka jingialang ula ong, ka pule dangle ka long ka mat treikam ba kongsan eh ka Sorkar bad ai jingithuh ia ka bynta ba la shim da ki Nonghikai bad ki Ophisar ha ka kam.

“Bun sien, ka jingtrei shitom ki Ophisar bad ki Nonghikai ka dei ka bym ioh jingithuh bad bym ioh jingiaroh wat hapdeng ka jingkitkhlieh kaba khraw kaba ki kit” ula ong.

Haba kdew ia ka jingaiti u (L) PA Sangma sha ka pule puthi, u Myntri Rangbah ula ong ba ki jingpynkylla ha ka kam pule puthi ka dei kaba la btin lynti da ki nongrim jong ka jongshakri kaba bha.

U Myntri Rangbah ula ai nam ruh ia ka jingpass bha ki Khynnah ia ka eksam SSLC sha ki prokram bapher ba la wanrah da ka Sorkar, kynthup ka CM IMPACT Guidebook, bad ban jur ia ka jingkongsan ban pule da ka jingsngewthuh ban ia kaba shu bam lyndet.

“Ka don ka jingiapher hapdeng ka jingpule ban shu tip ia ka jubab bad ka jingsngewthuh ia kaei ka jingmut” ula ong haba kyntu ia ki nonghikai ba kin pynleit jingmut ban pynbha ia ka jingmih na kaei kaba ki hikai hapdeng ki khynnah skul.

U Commissioner and Secretary ka Tnad pule u Vijay Kumar Mantri ula kren halor ki jingpyrshang ba dang iaid ka Sorkar ban pynjanai ia ka synshar khadar, ka jingtreikam ba shai bad ka jingpyndonkam ia ki technology ha ka kam pule dangle.

Ha kajuh ka por, u President ka AGHSSASTA-CB Labingstone G Momin ula ai khublei ia ka Sorkar halor ka jingpynbeit ia ki jingeh ba la slem jong ki nonghikai SSA bad ka jingkynshew ha ka kam pule dangle.