Jam ka Natya Samity ia u Mawker ba 100 snem ban pynneh ia ki mattithaw

U Myntri Rangbah ka Jylla Conrad K Sangma ula iashim bynta ha ka jingrakhe dap shispah snem ka Tura Natya Samity, kawei na ki Cultural Institution ba la rim tam ha ka thain ba la pynlong ha phyllaw ka Samity ha Lower Babupara, Tura, kaba long u mawmer ban sah khana ha ka histori ka jingiaid lynti ba 100 snem ban kyntiew ia ka mattithaw, deiriti, drama bad ka suk sain ha ka imlang sahlang.

Haba ai jingkren kum u kongsan u Myntri Rangbah ula ong, ka jingrakhe ban kynmaw ia ka spah snem ka jingtrei ban pynneh ia ka deiriti, ka jingtbit ak drama bad ia ka imlang sahlang naduh ba seng ia ka Samity ha u snem 1926. Ula ai khublei ia ki Dkhot bad kitbok ka Tura Natya Samity halor ka jingkynjoh ia u mawmer ba 100 snem bad ai burom ia ki pateng ki nongialam, ki barikor, ki nongkitkam bad ki dkhot kiba la noh synniang ha ka jingiaid lynti ka Samity ha ki shispah snem ba la leit.

“Kane ka long shisha ka sngi kaba khraw ban rakhe ia u mawmer, ka long kaba kongsan ia ngi ban phai dien ia ka lynti iaid ba phylla ha kine ki 100 snem ba la dep” ong u Myntri Rangbah bad bynrap ka Samity ka ieng mynta na ka jingtrei shitom khlem thait bad ka jingaiti ki President, Secretary barim, ki Barikor bad ki Dkhot ba la phah la ka jingim ban pynkhlain ia ka Samity bad ban pynneh ia ka deiriti pateng la pateng.

U Myntri Rangbah ula ban jur ka Tura Natya Samity kam dei tang ka seng ba pynneh ia ka deiriti hynrei “ka nongsumar ia ka pateng jong ngi bad ka nongsakhi ba im ia ka histori” kaba la sakhi ia ka por ka British India, ka jinglaitluid ka Ri India, ka jingpynkha ia ka Meghalaya bad ka jingkylla ka Meghalaya mynta ban pynneh ia ka deiriti.

Haba pynpaw ia ka bynta ba la shim da ka Samity ula ong, naduh ba seng ha u snem 1926, ka Samity ka la lamkhmat ia ki kam ak drama, ka rwai ka siaw, ka shad bad ka thoh ka tar ha ka thain ban sain dur ia ki pateng ki barikor, ki nongput nongtem, ki aktor bad ki nongthoh kot.

Haba kdew ka jingpaw ka Meghalaya ha ka put ka tem bad ki kam pynbyrngia ula ong, ka Shillong ba iatip mynshuwa kum ka “Rock Capital of India” ka la long mynta kum ka “Music Capital ka India”. Ula iathuh ka Meghalaya ka long kawei na ki jaka ba hakhmat tam ban pynlong ia ki Live Concert hapoh ka Ri, kaba la pynlong bun ki concert ki nongrwai ba pawnam ka pyrthei kum ka Def Leppard, Bryan Adams, Ed Sheeran, Europe, Akon bad ka Script.

“Kane ka pyni ba kumno ka deiriti ka la long ka pyrnon ba pun jingkieng hapdeng ka riti dustur ha ka pyrthei” ula ong.

U Myntri Rangbah ula pynbna ban ai jingiarap T.25 lak na bynta ka jingshna bad pynkhlain ia ki jingtei ha Tura Natya Samity.

Ha kane ka sngi la pyllait paidbah ia ka souvenir halor ka histori bad ki kam jong ka Samity.