Ban pynneh ia ka Mariang thung dieng bad pyllait dohkha ka KSU ha ki Wah

Kum shibynta ban pynneh ïa ka mariang ban pynduna ïa ka jakhlia ba mih man ka sngi bad ban pynkynmaw ïa ki nongshong shnong ban sumar ïa ka sawdong sawkun ka mariang, ka Khasi Students’ Union (KSU) ha ka 5 tarik u Jylliew 2026 ka la rakhe ïa ka sngi pynneh mariang ne ka World Environtment Day 2026 lyngba ki shnat treikam ha man ki District, ki Circle bad ki Unit bapher ha kylleng ka Ri Khasi.

Ha katei ka sngi la iashim bynta ruh da ki Nongialam Shnong bad ki Skul bapher bapher kiba don hapoh kitei ki shnat treikam.

Ka Khasi Students’ Union North Khasi Hills District Unit ka la rakhe ïa kane ka sngi, da kaba sam 3000 tylli ki tynrai dieng sha baroh ki Circle ki Unit bad la ïoh ban thung ïa baroh 3000 tylli ki tynrai dieng ha kylleng jong ka thaiñ ri Bhoi.

Ka Khasi Students’ Union Sawmer Unit kala pynlong ïa ka World Environment Day Exhibition Programme, ha Sunny Side Hall Sawmer, kaba la wan shimbynta da ki khynnah jong ki saw tylli ki skul kiba don hapoh ka shnong Sawmer, ki dkhot bad nongïalam Seng Samla Sawmer, ki Dkhot ka Villages Organization Sawmer (V.O), bad kiwei kiwei. Lah sakhi ruh ïa ki sap ba kyrpang jong ki khynnah skul ha kaban shna bad pynwandur ïa ki jingshna ne ki nongmuna ryngkat ki jingbatai kaba shai kumno ban pynneh ïa ka sadong sawkun jongka mariang kaba khuid ba suba.

Ka Khasi Students’ Union Mawkriah Sadew Laitjem Area Unit pat kala pynlong da ka jingïalap paidbah shaphang ka jingkordor jong ka mariang na ka bynta ka jingim ki briew ha kane ka pateng bad khamtam na ka bynta ka pateng ka ban wan bad kumno ban sumar ïa ka mei mariang, da kaba sam ïa ki kot lyngkdop sha ki paidbah kiba ïaid ba ïeng lyngba ka surok bah kumjuh ruh sha ki nongjngoh kai pyrthei (tourist) kiba ïaid lynti na kane ka surok.

Ka Seng ka la buh ruh ia ki tin buh ñiut ha ki katto katne ki jaka bad ki lad jong ka shnong khnang ba kiba ïaid ba ïeng kin bret ïa ki ñuit ki ñier ha ki jaka ba dei khnang ban lait na ka jingpynjaboh ia ka mariang.

Ka Khasi Students’ Union Mawlai Circle pat ka la pyllait ia ki kha symbai ha Wah Umsohlang kaba don ha ka shnong Mawlai Kynton Massar ban pynneh ïa ki dohum dohwah kiba la sdang ban duna bad duhjait katba nang ïaid ki sngi ki por.

Ka Khasi Students’ Union Lummawbah Unit kala rakhe ïa kane ka sngi pynneh mariang halor ka phang “Ban ïada bad ban pynneh pynsah ïa ka mei mariang” da kaba pynlong ïa ki prokram bapher bapher kaba kynthup ia ka Exhibition Program, Awareness Poster Competition, Drawing and Colouring Conpetition bad ka Awareness Programme na ka bynta ka khuid ka suba. Ha kane ka sngi la ïashimbynta da ki khynnah skul napher bapher kiba don hapoh ka shnong Lummawbah, ryngkat ka jingdon lang u Rangbah shnong ki Nongkitkam shnong bad ki Nongkitkam jong ka Seng Samla Shnong Lummawbah.

Ka Khasi Students’ Union (KSU) NEHU UNIT kala rakhe da kaba pynlong ia ka jingpynkhuid ne “Cleaning drive” shabar jong ka khyrdop jong kane ka skulbah, naduh ka khyrdop kaba 1 haduh khyrdop ba 3, kiba dei ki lynti ban rung shapoh ka skulbah NEHU bad kane ka jingrakhe ïa ka sngi pynneh mariang da kaba pynkhuid pynsuba ym tang na ka bynta ban itynnad ia ki lynti ki syngkien, hynrei ban sumar khuid na ka bynta ki pateng ban wan, khnang ba kin ïoh ïa ka lyer ba khuid.

Ka Khasi Students’ Union Mawkyllut Unit kala pynlong da jingpynkhuid ïa ka Wah Mawpon/Wah Sala kumjuh ruh ban thung ïa ki tynrai dieng harud jong kane ka Wah bad kala buh ruh ïa ki jaka bret ñiut ha ki khyrdop Skul, ki khyrdop Bank bad ha ki lad jongka shnong Mawkyrwat ban pynneh ia ka jingkhuid.

Ka Khasi Students’ Union Mawkyrwat Circle pat kala rakhe ïa kane ka sngi, da kaba pynlong ïa ka jingpynkhuid ïa ka Ïew Umjaraiñ kaba don hajan ka Um shit (Hot spring) kaba la wan ïashimbynta lang da ki Nongïalam Shnong, ki Seng Longkmie, ki Seng Samla Shnong, ki Nongshong Ïew, ki khynnah Skul bad ki dkhot ka KSU bad la pynlong ruh ïa ka jingthung ïa ki tynrai dieng ha St. Xavier’s College Umoid South West Khasi Hills District ha kaba la wan ban ïashimbynta da ki Phadar, ki samla pule.