U Myntri Rangbah ka jylla u Conrad K Sangma mynta ka sngi ula leit jngoh ia ka shnong Purakhasia bad kiwei ki shnong ba markhap kiba la shah ktah na ka jingshlei um. Ha kane ka sngi ka la don ka jingialang bad ki district bad ki nongtrei na ka block ha Purakhasia Block Office ha Puran Bazaar. U Myntri Rangbah ha kane ka jingleit jngoh ula iakren bad ki nongshong shnong bad ula pyntikna ba ka sorkar kan ai ka jingkyrshan sha kine ki lanot kiba la mad ia ka jingeh. U Conrad ula ong ba nalor ki iing, ki don ki pung um, ki jingthung jingtep kiba la shah pynjulor ha ka mariang.Ula ong ba ka tnad ka rep ka riang bad kiwei ki tnad sorkar kin sa leh ia kaba donkam na bynta ban ai jingiarap sha ki lonngiing kiba shah ktah.
Ha kane kajuh ka sngi, u Conrad u la leit jurip ruh ia ki jaka pyllang um kiba don hajan ka wah ha Purakhasia bad ula leit jngoh ruh ia ka jingkieng kaba pyniasoh ia ka Wagigitoksha Akimpara lyngba ka wah Grim. Ha kane ka sngi, u Myntri Rangbah u la pynlong ia ka jingialang ha Aikinpara bad ha shnong Posenggagre na bynta ban sngap ia ki jingeh bad u la kular ba na ka liang ka sorkar kan sa noh ka jingiarap sha baroh ki longiing kiba mad ia ka jingeh.
Ha kajuh ka por, u Conrad ula leit jurip ruh ia ka jingkieng Thallang kaba don ha Angalangre bad ula leit jngoh ruh ia ka jingkieng kaba la twa ha Rimrangpara.