Ban pynsngewthuh iaki khun samla sengkam lajong halor kumno ba kin tip bad skhem ka nongrim naka bynta ban seng kam ne ieng hala ki jong ki kjat, ka ophis u General Manager District Commerce & Industries Centre, Jowai hynne ka sngi kala pynlong daka workshop ba shisngi kaba hap hapoh ka skhim Raising and Accelerating MSME Performance (RAMP). Haka jingialang plie ia kane ka workshop ha conference hall ka DCIC la donlang u General Manager DCIC, u B Warjri, ka S E Kharpran, Functional Manager, DCIC, u E Pyrbot, Functional Manager, DCIC, u S.Pale, IPO nalor kiwei pat ki ophisar ka DCIC.
U B.Warjri General Manager DCIC u ong, ia kane ka RAMP la pynwandur kyrpang naka bynta ban kyrshan iaki nongsengkam lajong khnang ba kin lah kyntiew iaka kam ba ki trei. Kumta u kyntu iaki bad shah shkor bha iaki jinghikai naki riewshemphang, kumba naka liang ki ophisar ka DCIC ruh ki long la kloi ban iarap iaki ha kano kano ka por ba ki pan jingiarap. U E. Suting, Principal Good Shepherd School, Khimmusniang, Jowai, kum u riewshemphang haba ai jingkren haka jingialang plie ia kane ka workshop, ula kren ai mynsiem bad kyntu iaki nongsengkam lajong ba kin shim bynta shitrhem bad shim kabu ruh ia kum kine ki lad ki kabu ba wanrah daka ophis DCIC.
Ha kajuh ka por ula iathuh ruh iaka jingiaid lynti jong u hi shimet kiba long kum ka jingai mynsiem iaki nongshim bynta ha kane ka workshop, bad ong ruh bunsien hi ki lad jingiarap ba ai ka sorkar ki long lehnohei ka daw dei ba bun hi ki briew ki duna iaka jingnang jingtip bad duna iaka sap kumno ban pyniaid iaka kam. Na kata ka daw u ban jur halor ka jingdonkam ban bteng wad jingtip kumjuh ruh ban iashim bynta ha ki lad ai jinghikai namar kiba kum kine ki lah ban iarap pynheh pynroi iaka kam trei business.
Ka S.E Kharpran, Functional Manager DCIC ka kyntu iaki nongshim bynta ban sngew trai iaki jinghikai ba ki ioh, bad ruh ymtang ban pyndonkam haka kam business lajong hynrei ban ai mynsiem ruh ia kiwei.Shwa kane u E. Pyrbot. Functional Manager, DCIC ula ai ka jingbatai bniah halor kane ka workshop kumjuh ruh halor ka jingthmu kane ka RAMP bad ki skhim bapher bapher ba hap hapoh jong ka.