Nga kyrmen ban ioh Distinction na baroh 36 constituency ha ka ilekshon MP: Dr DRL Nonglait

Ha ka jingialang ialap election MP shiteng samoi ka party NPP na ka bynta u kyrtong jong ka u Dr. DRL Nonglait ha ka janmiet jong ka 21/07/2026 ha shnong Ummulong ba hap hapoh ka Nartiang Constituency, la sakhi ia ka jingwan shim bynta ki paidbah ba bun ban sngap ia ki jingkren jong ki nongialam ka party khamtam eh ka jingkren na u kyrtong u Dr. DRL Nonglait.Ha kane ka jingialang la donlang u Dy CM bah Sñiawbhalang Dhar uba dei ruh u MLA ka thaiñ nangta u Wailadmiki Shylla Myntri sorkar uba dei ruh u MLA ka Jowai Constituency, u Dr. C. Lyngdoh MLA ka Umsning, ki MDC JHADC nalor ki heh nongialam ka party.Kumba pynpaw kane ka by election ka don haduh 36 tylli ki constituency u Dr. Nonglait haba kren u ong, “Kum u nonghikai  haba ialeh ia kano kano ka exam ne haba  iakhun exam ki khynnah nga juh kheiñ ia ka jingdon ki paper, namar  kano kano  ka exam la pyntikna ia ka jingdon ki paper bad nga shim ruh ba kane ka jingiakhun MP ruh ka long kum ka exam ba don haduh 36 paper, ia kaba nga sngew dei kaba eh tam ha ka jingpule bad jingiakhun jong nga, hynrei watla katta nga khmih lynti ban ioh distinction ha baroh ki constituency kyrpang ha Nartiang bad Jowai”.

U ong ruh kine ki sngi dei kiba eh namar ha ba nangkiew ha ki liang bapher bapher la ha ki jingtei jingshna pule puthi ki jingeh ruh ki nangwan ha ka imlang sahlang.Kumta kumba ka synshar khadar ka don iaka kamram ba kongsan ban pynkynriah ia baroh ki jingeh, u sngew donkam ban shim bynta ha ka shynshar khadar na ka bynta ban iarap ia ki jingeh u paidbah da kaba bynrap ruh ba ka  jingeh ha ka bor pyrkhat pyrdaiñ ka jur bha ha kine ki sngi.U kyntu ruh ia ki paidbah ban ai ka jingkyrshan ia u ha kane ka election shiteng samoi namar ba donkam ban ioh ka sorkar ba iaineh, kaba khlaiñ ban wanrah iaka synshar khadar bad ruh ka roi ka par.Ha kajuh ka por kum u President ka Khasi Author Society u ong ba lada ki paidbah ki jied ia u kum u MP un leit iamir jingmut bad ki minister kumjuh ka sorkar India na ka bynta ban pynrung noh ia ka ktien Khasi hapoh ka khyrnit ba 8 ka riti synshar ka Ri, namar kane dei ka mat jong u paidbah ki sengbhalang  kumjuh ki party ba don ha ka liang pyrshah ka sorkar Jylla ruh  ki  kyrshan ia kane.

Nangta ba yn iakhun pynioh  ILP ruh ha ka Jylla, nalor ban leit sha parliament ban iasaid na ka bynta ka  jingmyntoi lang jong baroh ki seng saiñ hima hapoh ka Jylla”Kane ka election dei kaba la tip lypa mano ba thaw sorkar ha State bad Central kumta donkam ruh ban jied da u kyrtong ba don ha ka liang sorkar khnang ban suk iakren na ka bynta kano kano ka mat”  la bynrap Dr Nonglait.