Ka Dorbar Shnong Sangshong haka 15 tarik u Risaw 2024 kala mih sha khmat ban pynpaw ia ka jingsngewkhia halor ka jingkynthoh ka seng Hynniewtrep Youth Council (HYC) North West Khasi Hills District ba ka don ka jingthung kam officiating Sop sop ha Tirot Sing Memorial Civil Hospital Mairang, ka Hospital kaba don ha ka shnong Sangshong, Eastern West Khasi Hills District.
U General Secretary jong ka shnong Sangshong u bah Jesemy Nongrang ula iathuh ba ka shnong kaba ju iatreilang bad ka Hospital na ka bynta ka jingbit jingbiang jong ki paidbah hadien ba kala iohi haki lad pathai khubor iaka jingkynthoh jong ka seng kala leit ban ia kynduh ia u Medical Superintend u bah T.Lyngdoh bad wad iaka jingshisha. U bah Nongrang u la iathuh ba katkum ka jingiathuh u MS kam don ka jingthung kam Officiating sop sop kumba la shah kynthoh hynrei ka Hospital ka khot bylla katto katne ngut katkum ka jingdawa jong ka kam namar ka jingkhia palat ka kam ha Hospital naka jingduna jong ki Nongtrei bad ia kata ruh la leh tang haba don ki kam kiba donkam eh.
U bah Nongrang u la ong, ka long pat kaba jingshisha ba ka Hospital ka dang donkam shibun ki nongtrei bad kiwei kiwei ki jingdonkam hynrei ban shu kynthoh khlem ki jingshisha ka long kum ka jingialam bakla iaki paidbah. Shuh shuh ula kyrpad iaki seng bhalang ba nangne shakhmat lada ki don kam ban rung shapoh u pud u sam jong ka shnong Sangshong ki dei ban da pyntip iaka shnong bad ka shnong ruh ka kloi ban ia treilang lada kata ka kam ka dei naka bynta ka bha ka miat jong u paidbah.