Ka Meghalaya ka la kiew stet ha ki 5 snem: Conrad

Ryngkat shityllup ka Ri ka Jylla Meghalaya ka la rakhe ia ka sngi Laitluid ne Independence Day ba 80 snem ha kylleng ka jylla bad ka jingrakhe ba heh tam ka long ha Madan Polo, Shillong, ha kaba u Myntri Rangbah ka Jylla Conrad K Sangma ula pynher ia ka lama ka Ri bad shim ia ka Rashtriya Salute ia ki kynhun ba iaid Parade kynthup ki shipai, pulit, khynnah skul bad kiwei.
Haba kren ha ka jing-ialang u Conrad K Sangma ula ong, ka Meghalaya ka la kiew ha kine ki 8 snem ba la dep da ka jingphai khmat ka sorkar sha ki jaka puta ki paitbah, ka kolshor bad ka ioh ka kot ka Jylla ka la kiew ar shah naduh u 2018 bad ka Meghalaya ka dei kawei na ki Jylla ba la kiew sted hapoh ka Ri ha ki 5 snem ba la dep.
U Conrad ula ong, ka jingiap ki longkmie ba kha khun ka la hiar da palat 56% ha u snem 2020, katba ka jingiap ki khyllung ka la hiar da 40%. Ka Chief Minister’s Safe Motherhood Scheme ka la iarap ban pynkit sha ki jaka sumar ia kumba shilak ngut ki long-kmie armet ba kin ioh jing-sumar, kynthup palat 15,800 ki longkmie ba shi-tom jur.
U la iathuh ka Megha-laya ka la jam na ka kyr-dan hatrai duh hapoh ka National Performance Grading Index. Ka jingioh mark ka jylla ka la kiew na ka 448 sha ka 525 ha ka shisnem. Ula kdew ka jingkiew ha ka jingpass ki khynnah ha ka result SSLC ka la kiew na ka 57% ha u 2018 sha ka 97.2%, katba ka result HSSLC ka la kiew na ka 75% sha ka 86.6%. Ka jingsiew tulop ba la pynbeit ryntih palat 23,000 ngut ki nonghikai SSA, Ad-hoc bad kiwei ki kyrdan ka la treikam naduh ka 1 tarik Iaiong mynta u snem.
U Myntri Rangbah ula ong palat 55,000 ngut ki samla ki la ioh jinghikai hapoh ka CM Skill Mission naduh u 2022 bad palat 3,100 ngut ki samla ki la ioh kam shabar ka Meghalaya kynthup ka kam pdiang sngewbha ia ki briew nabar, ka jingpynmih mar bad ban lum jingkhein jingdiah.
Ula ong, ba ka PRIME prokram mynta ka la kyrshan palat 6000 ngut ki nong sengkam, katba ka CM-ELEVATE ka la kyrshan ia palat 3000 ngut ki nongioh myntoi. Ha kine ki prokam la lah ban ai kam 10,000 ngut bad 25,000 kiba ioh kamai.
U bynrap haduh ki don 240 tylli ki project ba tei ha ki shnong bad ki don ba dang pyntrei. Ka STAR prokram ka la peit bniah ia 24,500 ngut ki khynnah ialehkai bad ka policy thungkam sorkar ia ki nongialehkai ba wanrah burom ka la ai jingmyntoi ia ki nongialehkai ba khur takma bad uwei na ka kop niah lieng Cacoe u Pynshngain Kurbah u dei u nongialehkai banyngkong ba ioh kam sorkar hapoh kane ka Policy.
U Conrad ula ong, ka Meghalaya kan kynjoh 55 snem ha u snem ban wan bad kan pynlong ia ka 39th National Games bad palat 10,000 ngut ki nongialehkai na kylleng ka Ri la khmih lynti ba kin shim bynta ha ki 39 tylli ki jingialehkai, ha Shillong, Tura bad Jowai nalor kiwei ki jaka, ka jingpynkhreh ka la iaid shakhmat na bynta ka National Games.
“Ka jingtih marpoh khyndew ha jylla ka la sdang katkum ka jingstad saian hadien hukum ka Iingbishar Supreme Court ha u 2019 ba iadei bad ka hok longtrai da ki riewshimet bad ki shnong ki thaw ia ki marpoh khyndew ba don hapoh ki jaka jong ki bad ka Sorkar ka la pynkhreh ia ki kyndon treikam na ka bynta ki nongtih par ba rit” U la ong.
Ka rep ka long ba kongsan ba ka sorkar ka phaikhmat lyngba ka CM FARM+ Prokram ka kyrshan ia 25,000 ngut ki nongrep ka Jylla lyngba ki symbai bad ula pynpaw u Lakadong, Organic, Floriculrure bad Ginger Mission kum ki nuksa ban kyntiew ia ka kamai kajih ki nongrep.
Ula ong ka Jylla ka la kyrshan palat 4,500 ngut ki nongrep synsar lyngba ka CM ASSURE ha u snem ba la dep bad la siew ka bhah ki nongrep bad ka Insurance Premium palat 72,000 ngut ki nongrep hapoh ka Pradhan Mantri Fasal Bima Yojana. Ka karkhana thymmai ha Bhoirymbong, Ri-Bhoi kan pyndonkam haduh 10000 metric ton u sying shisnem bad kan iarap ai kumba 5,500 ngut ki nongrep na 112 tylli ki shnong.
Ula bynrap ka jingdon ki khlaw ha Jylla ka kot haduh 76% bad ka GREEN Meghalaya Plus Prokram ka sorkar ka la sumar ia 63,000 hectare ki jaka khlaw bad kumba 63,000 ngut ki nongrep ki ioh ka jingsiew ban iada ia ki khlaw, ula ong. Palat 60,000 tylli ki umpohliew la ithuh donkam ban iada bad palat 500 ki jingtei pynlang um la shna ha Jylla bad ula iathuh ka jingdon ki longiing ba ioh um iing ka la kiew na ka 4,550 ha u 2019 sha ka 5.47 lak ha ki shnong kyndong.
“Ka kam jngohkai ka la nangkiew na ka jingwan shangkai ki briew nabar na ka 12 lak ha u 2018 sha ka 18 lak, ha ka Homestay prokram ka sorkar ka la kyrshan haduh T.7 lak ki nongseng kam shimet bad ka Meghalaya Grassroots Music Prokram ka la kyrshan palat 8,850 ngut ki kaitor lyngba 18 hajar ki rynsan pynisap ki nongput nongtem” la ong u Conrad bad ula bynrap ka sorkar lyngba ka DREAM Mission ka la iakhun pyrshah pynduh jait ia u drok bad kiwei ki jingdih ba sniew.
Ka jingrakhe Sngi Laitluid ba 80 snem ka Ri India ka long kaba iphuh bad shongkun da ka shim bynta shitrhem ki paitbah bad la pyniphuh iphieng ia ka pro-kram da ki jingrwai, shad na ki khynnah skul bad u Myntri Rangbah ula sam ruh ki khusnam bapher bapher.