Da ka jingïalang ba lai sngi pynlong ka CAU halor ka rep mariang

Ka Central Agricultural University (CAU), Imphal, kan pyllong ia ka jingialang bah kaba lai sngi halor ka rep mariang ka “Natural Farming: Pathways to Self-reliant Farming and Rura Prosperity (NCNF 2026)” kaban sdang naduh ka 9 tarik haduh ka 11 tarik Nailur, 2026 ha ka College of Post Graduate Studies in Agricultural Sciences (CPGSAS), Umiam kaba don ha Ri-Bhoi District Meghalaya.

Ia kane ka jingialang yn pyllong ha ryngkat ka jingiatreilang bad ka Indian Council of Agricultural Research (ICAR), New Delhi, DST-North East Centre for Technology Application and Reach (NECTAR), Shillong, Rani Lakshmi Bai Central Agricultural Jniversity, Jhansi, Dr. Rajendra Prasad Central Agricultural University, Pusa and Gujarat Natural Farming Science University, Gujarat. Yn pyniaid da u Dr. Anupam Mishra, u Vice-Chancellor ka CAU, Imphal bad u Prof. Dwipendra Thakuria jong ka Dean, CPGSAS bad Organizing Secretary, NCNF 2026.

Ha kane ka jingialang kan don ka jingiashim bynta lang jong ki ophis bad ki jaka pule wad bniah halor ka rep ka riang, ki nongkhaii, ki khynnah bad ki nongrep na ka kylleng ki jaka jong ka ri.

Haba kren sha ki lad pathai khubor, u Prof, Dwipendra Thakuria ula ong ba ia kane ka jingialang yn plie pyrda da u Lakshman Prasad Acharya, u Lat ka jylla Assam uban long kum u kongsan ha ryngkat ka jingdonlang kiwei de ki Symbud Kongsan kiba kynthup u Narayan Singh Kushwah u Myntri ka tnad Social Justice & Horticulture, ka sorkar Madhya Pradesh, u Dr. C.K. Timbadia, u Vice Chancellor ka Gujarat Natural Farming Science University, Dr. P.S. Pandey u Vice Chancellor, RPCAU, Pusa, Bihar, Dr. A.K. Singh u Vice Chancellor ka RLBCAU, Jhansi, u Timothy D. Shira u Myntri ka tnad a rep ka riang ka sorkar jylla Meghalaya, u Dr Joram Aniya u dkhot ka NITI Aayog, New Delhi nalor kiwei de.

Ula ong ba ka jingthmu jong kane ka jingialang ka long ban ai rynsan na bynta ban iasam jingmut halor ka jingwad bniah, ka jingshem ha madan bad halor ki polisi treikam.

U Thakuria ula ong ba ka jingiathir ha kane ka jingialang kan long halor ka jingsumar bad pynneh ia ka spah mariang bad ka jinglah ban ialeh pyrshah ia ka jingkylla ka suinbneng, ka jingiada ia ki jingthung kaba iadei bad ka mariang bad ki lad iada, ka rukom thung symbai , ki rukom rep, ki rukom treikam bad ka jingpynneh ia ka jingiadie iathied. Kane ka jingialang kan pyrshang ban kyntiew ia ka jingiatreilang hapdeng ki nongwad bniah, ki nongthaw ain, ki ophis pynroi, ki riew shemphang kam rep, ki kynhun nongrep ban kyntiew ia ka rep tynrai lyngba ki jingshem thymmai katkum bor stad technology.

Ula ong ba la khmih lynti kumba 450-500 ngut ki nongiashim ban wan ha kane ka jingialang.