Ki khynnah ba pyrshah ia ka ain ki donkam jingsumar ban pynkylla, ym ban pynshitom kum ki nongkam sniew: Chief Justice

Ka Juvenile Justice Committee jong ka Meghalaya High Court ryngkat ka jingiatreilang bad ka tnad Social Welfare bad ka tnad ka Koit ka Khiah ka sorkar jylla hnnin ka sngi Thohdieng ka la pynlong ia ka jingialang mir jingmut halor ka “Ka Ain ia ka Hok jong ki Khynnah (Ka Jingsumar bad Iada ia ki Khynnah), Act 2015: Ka Shiphew snem ka jingpyntreikam bad ka lynti shakhmat” (Juvenile Justice (Care and Protection of Children) Act, 2015: A Decade of Implementation and the Way Forward) ha Auditorium ka Meghalaya High Court, Shillong.

Haba ai jingkren ha ka jingialang, ka Chief Justice ka Meghalaya High Court ka Revati Mohite Dere ka la ong, kane ka jingiasyllok kam dei tang ka jingbishar bniah ia ka Juvenile Justice Act hynrei ka dei ruh ka lad ban bishar ia ka jingshimkhia lang jong ka imlang sahlang ia ki khynnah.

“Mynta ka sngi, ngi iasyllok halor ka jingpyntreikam ia ka Juvenile Justice Act ha kine ki phew snem ba la dep bad ngi iakren ia ka lynti ban iaid shakhmat. Ka jingialang kam dei tang ka jingbishar bniah ia ka ain, hynrei ka dei ka jingpeit bniah ia ka jingsngew jong ngi. Ngi don hangne ban bishar ia ka jingkular ia ki khun jong ngi,” ka la ong.

Ka Chief Justice ka la ong, la thaw ia kane ka ain ban pynthikna ba ki khynnah ba ialeh pyrshah ia ka ain ki donkam ka jingsumar ban pynkylla sha jingbha ym kum ki nongleh sniew ban shah pynshitom, ki khynnah ki donkam ka jingsumar bad iada ban kyrshan ia ka lawei jong ki.

Ka la pynpaw ka jingkylla ka jingbishar na kaba pynshitom beiñ sha ka jingbishar hok ban pynkylla sha ka jingbha, da kaba ong ba ka jingpyrkhat ka dei ban sngewthuh kiba la pynlong ia u khynnah ban leh ia ka kam runar.

Ka Chief Justice ka la ong, ka jingpynlong ia ki tnat treikam ka dei ban long ka lad kaba khatduh, khamtam ha Meghalaya kaba don ia ki jingiadei kiba khlain ha ka imlang sahlang. Ka la khot ia ka jingiatreilang hapdeng ki pulit, ka tnad pule puthi, ka koit ka khiah bad kiwei kiwei ki tnad ban weng ia ki jingeh kum ka jingpep skul, ka jingkoit jingkhiah ha ka bor pyrkhat, ka jingdih buaid bad ka jingpyntreikam ia ki khynnah bad ka la bynrap ki dang don katto katne ki jingeh, kynthup ka jingpynslem ha ki jingkylli ban tip ïa ka rta, ki jaka sumar ia ki khynnah, ka jingbym don ka jingïatylli hapdeng ki tnad, ka jingdih buaid ki khynnah kaba long pyrshah ïa ka aiñ, bad ka jingdonkam pynbha ïa ki jingtei kiba donkam kum ki lad pynroi.

“Lada ngi pynrem ia u khynnah mynta ka sngi, ngin iakynduh ia u nongleh kam sniew la shai ka sngi”, ka la ong da kaba khot ia baroh ki nongshim bynta ban iatreilang ban pynthikna ki lad jingsumar, jingiada ban pynkylla ia ka lawei ba bha ia uwei pa uwei u khynnah.

Kiwei pat kiba la ai jingkren ha ka jingialang ki long u Justice H.S. Thangkhiew, Judge ka High Court uba long ruh u Chairperson ka Juvenile Justice Committee, Meghalaya High Court, u Additional Chief Secretary u Sampath Kumar, IAS, Justice B. Bhattacharjee, Judge jong ka High Court, ka Saloni Verma, IAS, Director, Social Welfare Department, Dr. Neela E. Kharsahnoh, Director Health Services (MI) bad kiwei ki ophisar na ki tnad sorkar.