Sngewsih u bah Paul ba ka UDP ka lah ban don sa tang 1 ne 2 ngut ki MLA

U Nongialam ka United Democratic Party (UDP) uba long ruh u MLA ka West Shillong Constituency u Bah Paul Lyngdoh ula pynpaw ia ka jingsngewsih ba ka seng riewlum kaba don bynta ha ka jingiakhun ban pynioh ia ka Jylla Riewlum mynta ka don ha ka khep ba ka lah ban sah noh sa tang 1-2 ngut ki MLA.
U Bah Paul ula kren ia katei kadei hadien ba kila saphriang ki khubor ba 9 ngut ki MLA ki don jingthmu ban pyniasoh noh bad ka seng BJP katba 2 ngut pat ki don jingthmu ban leit pyniasoh noh bad ka seng NPP.
Ha kaba iadei bad ka jinglong jingman hapoh ka seng UDP, u Bah Paul Lyngdoh ula ong, “Ngam kwah ban kynnoh iano iano ruh, halor ka jingpulom jong ka seng UDP da kaba kdew ia uno uno u riewshimet. Hynrei kum uwei uba ju don ia ka mynsiem trai ri nga sngew ba ka long kaba sngewsih bha ba ka seng riewlum kaba iadonbynta ha ka jingiakhun ban pynioh ia ka Jylla riewlum mynta ka lah ban sah noh sa tang 1-2 ngut ki MLA”.
U Bah Paul ula ong, ba dang ha kine ki khyndiat sngi ula dep ban kren ba bun ki MLA kila iakren bad ki nongialam ba hakhlieh ka BJP. Kane ka pyni ba kam don satia ka jingiaid beit iaid ryntih hapoh jong ka seng UDP.
Ula ong, ba ha ka por ba u dang don ha ka Kynhun Myntri ula pyr-shang kat lah kat iai ban treikam bha kaba mut ruh ba ki MLA ka seng ruh ki ia bunkam lang bad bun tylli ki projek bad ki skhim la sdang
ha ki constituency jong ki.
“Hynrei hadien kane, baroh ki iatip lut ia kaei kaba jia, kan long kaba bakla na ka liang ka jong nga ban iaroh ne put turoi ialade hynrei kaei kaba la jia ka kdew ia ka kyrdan ia kaba shaei ka seng kan poi nangne shakhmat” la ong Bah Paul.
Halor ka jingkylli la ka UDP ka donkam noh da u nongialam ba thymmai, u Bah Paul ula ong, “Ba ia katei ka rukom bishar bniah kadei ban mih hi na ki lad pathai khubor”.
U Bah Paul ula ai nuksa ruh da kaba ong, “Ngi don hangne ha ka prokram jong ka Langsning FC, kan long kaba eh shibun ia uno uno u rangialehkai ban bishar ia ka rukom ialehkai ka jongu, dei u Coach, ki nongpeitkai kiba lah ban bishar ia ka kyrdan bad ia ka jingtbit jong uwei pa uwei u rangialehkai”.