Kan long kaba sngewsih lada ka UDP ka khyllem noh kum ka Party riewlum: Paul

U MLA ka UDP na West Shillong u bah Paul Lyngdoh ula pynpaw ka jinglong artatien ban dang iai neh ha ka party UDP lada ka jinglong jingman hapoh ka party ka dang iai long ka bym shongsuk shongsain. Haba kren sha ki lad pathai khubor, u bah Paul ula pynkynmaw ba dang shen ha ka sngi rakhe ka party ia ka Foundation day, ula ong ba kan long ka sngi kaba sngewsih lada ka UDP ka khyllem noh kum ka party riewlum namar ba udei uwei na ki nongialam uba don ia ka jingmut jingpyrkhat bad ka jingsngew riewlum bad ha ki ar samoi kum u MLA ruh ula jop na kane ka party riewlum, kaba pynshisha ba ki paidbah kila jied ia u bad ia ka party.

U bah Paul ula pynpaw ka jingsngewkhia ba ki dak ki shin ha kynroh ka UDP ka shai bha kdar ba ka don ka jingiapait iapra ha ka party bad kane ka lah ban wanlam sha ka jingkhyllem ka party. Halor ka jingkylli la u don jingthmu ban iasoh sha ka BJP ne NPP party, u bah Paul ula ong ba ia mynta u dang iasyllok bad ki nongkitkam, ki nongialam bad ki nongkyrshan jong u ha ka konstitwensi ban jied sha kano ka lynti kaba biang tam.“Ia mynta nga dang ia phylliew jingmut ba ki nongkyrshan bad ki nongialam bad ka jingiakren ka dang iaid shakhmat. Hynrei ha ka por ba biang ngan sa pynpaw ia ka rai jong nga,” ula ong.

Kumba long mynta, u bah Paul um pat don ha ka kynhun ki 8 ngut ki MLA ka UDP kiba la iakren bad ka BJP hynrei u dang pyrkhat pynshongnia shwa ban leit iasoh lang ne em bad ki, ne un leit da kawei ka lynti.“Ka jingkhang ka dang plie, shano ngin jied”, la ong u bah Paul.