Ka MIRSS ka don ki kyndon ban tehlakam nongbylla bar Jylla: Methodius Dkhar

Ka Sorkar Meghalaya ka la pynkhlaiñ ïa ki kyndon ban teh lakam ïa ka jingwan ki nongbylla bar Jylla da ka bsuh ia ki kyndon ba khlain ka Meghalaya Identification, Registration and Safety of Migrant Workers System (MIRSS).

U Myntri ka tnat Labour u Bah Methodius Dkhar ula ong, ia ka website bad ia ka MIRSS la pynmih paidbah ha ka 9 tarik Nailur bad ki jingpynbeit thymmai ïa ki kyndon jong ka aiñ ruh la dep pyntreikam, kaba pynsuk bad pynkhlaiñ shuh shuh ïa ka rukom lum jingtip bad buddien ïa ki migrant labour bad ki contractor.

U Bah Methodius ula ong baka Sorkar ka thmu ban pynthikna ba ki contractor kin bud ryntih ïa ki kyndon bad ki jingbthah kiba iadei bad ka jingpynrung kyrteng bad ka jingpynneh ïa ki migrant labour ha ki jaka trei.

Ula pynshai ba ki jingdain kuna kin ym dei ïa ki nongbylla hynrei ka kuna ka dei beit iaki Contractor kiba pynkheiñ ïa ki kyndon.

“Ka kuna kan long ha lai bynta. Ha ka sien kaba nyngkong, u contractor un hap siew T10,000, ha ka sien kaba ar, T25,000, katba ha ka sien kaba lai, ka kuna kan poi haduh Rs1 lak, ryngkat bad ka jingpynshitom da kaba shah set along haduh lai bnai” la ong u Bah Methodius.

U Bah Methodius u la pynshai ruh ba lada don u briew uba wan sha Meghalaya ban trei, dei ban don u nongpynshah trei lane contractor uba thung ïa u. Kumta, ka jingpynshitom katkum ki kyndon kan leit sha u contractor uba pynkheiñ ïa ka aiñ, ym sha u labourer.

“Ka kam jong ngi kam dei ban leit khmih ïa ki briew ha surok, hynrei ban khmih ïa ki jaka trei,” la ong u Bah Methodius.

U la ong ba lada ki bor sorkar ki lap ïa kino kino ki briew kiba trei ha kino kino ki jaka trei khlem ka registration kaba donkam, yn shim da ki sienjam katkum ka aiñ, bad ka jingpynshitom kan long pyrshah ïa u contractor.

Kane ka jingpynkhlaiñ ïa ka registration bad ki penalty ka long shi bynta na ka jingpyrshang jong ka Sorkar ban wanrah ïa ka rukom treikam kaba kham thikna ban tip ïa ki migrant labour kiba wan trei sha Meghalaya bad ban pynbor ïa ki contractor ban bud ryntih ïa ki kyndon.