Ka NPP kam ju thied khlieh briew kumba thied khlieh dohkha: Prestone

U President ka NPP ka Meghalaya Bah Prestone Tynsong, ula pynshai ba ka jingbun ki paitbah ba wan shim bynta ha ka jingialang ka NPP ka dei namar ka jingtrei shitom ki nongialam bad ki nongkitkam ka seng bad kam dei satia kumba la don kiba kynnoh ba ka NPP ka la shu thied khlieh briew.

“Nga sngew kum kita ki khun riewspah, ba lah hana ban leit thied ia ka khlieh briew, sngew kumba leit sha iew Shella ban leit thied ia ka khlieh dohkha. Nga kwah ban jubab hangne, na ka bynta kito ki lok kiba kynnoh ia ngi kumtei. Ka NPP kaba don ia ka nongrim, naduh ka State Level haduh ka National Level hapoh ka jingialam jong u National President bad kumjuh ruh hapoh ka jingialam ka jong nga ia ka jylla kum u State President, ngi lah bthah ia baroh ki District, Block bad ki Unit bad ha kylleng sawdong jong ka jylla Meghalaya bad ki Committee kiba don ha ki shnong ki bapher bapher kim dei ban thiah ban dem, kidei ban leit rung ha ki iing ki sem bad ban peit lem ia ka jingdonkam ki shnong ki thaw bad khamtam ia ki longiing kiba duk kiba jynjar kiba donkam ia ka jingiarap namar ka jingthmu ban thaw ia ka NPP kadei ban shakri ia ki paitbah” la ong u Bah Prestone Tynsong haba kren ha ka jingialang ialap elekshon kaba la pynlong da ka NPP Shella Block ha Pynshadkhurai, Saitsohpen hynin ka sngi Balang.

U Bah Prestone ula ong, “Ka daw tynrai ba ki kynnoh kumtei, kadei namar ba kim lah ban pynshit bad pynrhem ia ka jingmut jong ki paitbah ha ki constituency bapher. Kim ai um, um don umjer, umdon sboh. Haba phi thung jhur ha phyllaw iing lajong, lada phim ai um kam don jingmut, u tyrso tang shi sla ruh un ym ioh ban shim, kata kadei ka jingshisha. Hynrei haba ngi thung jingthung la ha kadei ha bri ne ha iing, ngi hap ban sumar ia kita bad haba ngi sumar ka mut ngin ioh ban kheit ia u soh uba biang. Hynrei ki lok ki bym leh kumta, haba ki iohi pynban ia kiwei pat ba ki bunkam ban ai um ban ai sboh, ki ialade bym lah, ki shu kynnoh beiñ bapli ia ka NPP”.

U la ong, yn lehnoh ei lut ki syntiew, ki jhur ki jhep lada um ai jingsumar, hynrei ka seng NPP haba ka thung, ka sumar bad ka pynseisoh ruh ia ki.

Katba u Dr DRL Nonglait u kyrtong ka NPP ha ka elekshon shiteng samoi jongka MP Lok Sabha ula ong, ba kane ka elekshon kam dei satia ban thaw sorkar, namar ba ka Sorkar Jylla bad ka Sorkar Pdeng kidei kiba la don lypa kumta ki paitbah kidei ban jied ia u kum u kyrtong ka NPP kaba don ha ka Liang Synshar khnang ba un lah ban wanrah ia ki kam pynroi khamtam eh ban pynurlong ia ki mat jingdawa jong ki paitbah ban pynrung ia ka ktien Khasi bad Garo ha ka Eight Schedule jong ka riti synshar ka ri, ban pyntreikam ia ka ILP ha ka jylla, ban pyrshah ia ka jingtih Uranium kiba dei ki ishu kiba ka NPP kala wanrah da ka Resolution bad la ioh jingmynjur ruh ha ka iingdorbar thawain ka jylla.

Ha kane ka sngi, ki nongialam ka NPP kila pdiang sngewbha ruh ia ki nongialam na ka seng UDP bad ia ki paitbah ka Shella Constituency kiba la wan ban pyniasoh noh ialade sha ka seng NPP, ha kaba la iadonlang ki MLA ka NPP ka Kong Ampareen Lyngdoh, u Subir Marak, u Bah Gavin Mylliem, ka MDC ka Shella ka Kong Grace Mary Kharpuri, ki nongialam ka NPP bad da ki hajar ngut ki paitbah kiba la wan sha kane ka jingialang.