Da ki hajar iaid kjat ki Babu LP na Pynthorumkhrah sha ophis NPP

Da ki hajar ngut ki nonghikai na kylleng ki skul jong ka ri khasi Jaintia bad Garo hapoh ka lama jong ka All Meghalaya Primary School Teachers Association (AMPSTA) hynne ka sngi ki la mih surok ban iaid rally ban pynsngew sha ka sorkar ia ki mat jingdawa.

Ia kane ka rally la sdang na Dorbar shnong Pynthorumkhrah Golflink Community Hall bad la iaid ter ter sha Polo, Ophis NPP, Sawfurlong bad la pynkut biang ha kajuh ka jaka da ka jingialang.

Haba kren ha ka jingialang, u General Secretary ka AMPSTA u bah FC.Shullai ula pynpaw ka jingsngewburom ia ka sorkar jylla namar ba ka la sngap 30 percent na ka 100 percent ki mat jingdawa jong ki nonghikai.Ula bynrap ba watla ka sorkar ka la jubab ia ki katto katne ki jingdawa jong ki, ka AMPSTA kan ym pat shong kli kti katba ym pat urlong lut baroh 8 tylli ki mat jingdawa.

U bah Shullai ula ong ba napdeng ki 8 tylli ki mat jingdawa, ka sorkar ka sngap ia katto katne ki mat jingdawa ha kaba ka la rai ban pynneh pynsah ia ki saction post jong Govt bad deficit, katba haba iadei bad ka jindawa ban regularize ia ki nonghikai L.P School kiba rung ha ka kam shuwa u snem 2007, ka sorkar ka dang iaid shakhmat haba iadei bad kane.

“ Ka sorkar ka la pdiang bad ka la ai da ka jingthoh ba kan ym ktah eiei ia kine ki post hadien ba la shongthait. Nga sngew ba kane kadei kawei na ka jingjop,” ong u bah Shullai.

Ula ong ba kane ka Rally ka long ban pynsngew sha ka sorkar ba kane ka dang dei tang ka sienjam ba nyngkong jong ka jingiakhih bad lada ka sorkar kam sngap ia kiwei ki mat jingdawa ba dang sah, kin sa shim pat ia kawei ka lad jingiakhih kumba leh ha u snem 1983.

U Genaral Secretary ka AMSTA ula ong ba ki nonghikai kin iakhun haban da ioh ia ki mat jingdawa bad lada ka sorkar kam sngap kin shim ia ka sienjam ba tyngeh ha kaba ki lah ban khang skul ne ban iakhih hakhmat Secretariat.

Ha kajuh ula ban jur ia ka sorkar ba kadei ban sngap ia ka jingdawa ban weng noh ia ki skul Deficit kiba shah kynthup ha ki skul Notified School bad ban weng ia ka kyndon ba dei ban don 15 ngut ki khynnah ha kawei ka klas.

Ki mat jingdawa ki nonghikai ki kynthup ban pynneh pynsah ia ki saction post jong Govt, deficit. Ban pyndap mardor ia ki kam ba sah thylli ha ki skul sorkar bad deficit, ka Sorkar kadei ban sanction ia ki Additional Posts khamtam ha ki skul kiba don nonghikai tang marwei, ban pyntreikam pura ia ka Government PRAN, bad ban pyllait ia ki nonghikai Primary School na ka kam thoh cencus ‘BLO’ Duty’ bad ban pynlong ki nonghikai kiba tista ‘regularize’ ia Ki nonghikai LP School kiba rung ha ka kam shuwa u snem 2007 bad ban weng noh ia kawei na kine ki Order kata ka long EDN.79/2005/72 kaba dei ha ka 27 tarik Naitung 2026, ha ka bynta 1(a)(i) bad (ii), bad ha ka bynta 5(a) kaba iadei bad ki Notified Schools.