Ai jamin ka Iingbishar 20 sngi ia Vice President KSU ban leit shah sumar

Ka Iing Kashari mynta ka janmiet sngi Hatmajai ka la ai jamin ba shipor 20 sngi ia u Vice President ka Khasi Student Union (KSU) u samla Pynkmenlang Sanmiet ban leit sumar ia ka jingshitom kaba la ban ia u.

U samla Pynkmenlang Sanmiet ryngkat kiwei pat ki nongialam ki la shah kem ha ki pulit ka jylla ha ka 19 tarik Nailar 2026 halor ka jingmih ka huri hura ha ka rally ar shaka ka KSU.

Ka jingioh jamin shipor u samla Pynkmenlang Sanmiet kadei namar u don hapdeng ka met ka bym koit bym khiah bha namar ka jngshitom kaba la don lypa kaba lah khie pang biang mynta.

Haba kren sha ki nongthoh mynta ka janmiet hadien ba la ioh Jamin, u samla Pynkmenlang ula ong ba naduh u bnai Naitung ula don jingshitom ha ka met bad u la thiah ha Hospital Bethany ban ioh ka jingsumar bad hadien katto katne, ki la bthah ia u ban leh ia ka Medical Checkup namar ba u don ka jingshitom bad ba u hap ban pyndep ia ka Surgery kaba dei hapoh ka 6 taiew. Hynrei hapoh kine ki taiew ula shah kem noh bad ym shym la lah ban pyndep ia ka surgery.

“ Kumba long mynta nga la ioh ia ka jamin ba shipor kaba dei 20 sngi bad hapoh kine ki sngi ngan pyrshang katba lah ba ngan iaphylliew jingmut bad ki doktor kiba sumar ianga ha Bethany ban ioh ia ka jingsumar,” ula ong.

U samla Pynkmenlang ula iathuh ba u ju don ka por ba u ju phlei snam ka khmut, ka don ka por ba u don ka BP bad ka jingktha khlieh bad ka jingjynjar ban ring mynsiem khamtam ha ka por thiah.

Ha kajuh ka por ula ai khublei ia ki doktor bad ki nongtrei ha Shillong District Jail, kiba ju iarap ia u haba u pan jingiarap.