Ka VPP ka iada jinglong kyrpang ka jaidbynriew

U kyrtong jong ka Voice of the People Party (VPP) u Dr. Batskhem Myrboh ula ong ba ka VPP ka dei ka seng riewlum kaba peit ia ka jinglong kyrpang jong ka jaidbynriew, ym kum kiwei ki seng riewlum kiba phong tang da ka dur bula seng riewlum.

Ha ka jingiakren, u Dr. Batskhem ula ong ba ki seng riewlum kiba don baroh shi katta ha kane ka jylla, ki shu phong da ka mask seng riewlum katba ka doh ka snam jong ki ka la long kum kiwei ki seng sain pyrthei na kiwei ki jylla jong ka ri India.

Ula kynthah tyngeh ba don ki seng riewlum ki bym nud tang ban ong ba ka jylla ka donkam ia ka Inner Line Permit (ILP) ha u snem 2013.

“Ngi seng ia ka VPP namar ba ngi tip shai ba ym don shuh ka party ba shisha bad ngi kwah ban shim ia ka sienjam ban seng ia ka party ba thymmai. Naduh ba nyngkong hi ngi la ong ba ka VPP kan long kata ka seng riewlum kaba dei tang maka bad ngi iohi ba ka don kata ka lynti namar ba kiwei ki seng riewlym ki la phong dur bula hynrei ka doh ka snam kam don. Na kata ka daw mar synmih ka VPP, ki paidbah ki kyrshan ia kane ka party bad kiwei ki seng sain pyrthei kim lah ban shah ia kane,” ong u Dr. Batskhem

Ka VPP ka la khie rasong naduh ka elekshon MP 2024 hadien ba u kyrtong jongka, u late Dr. Ricky AJ Syngkon ula sar naphang da kaba tam kput ia kiwei ki kyrtong na jan baroh ki konstitwensi ka ri Khasi-Jaintia.

Ka UDP kawei na ki seng riewlum ryngkat ka jingiatreilang bad ka HSPPD ka la hiar sha trai ha katei ka elekshon. Ka VPP ka la ioh ia ka jingbun paid ruh marwei ha elekshon sha ka KHADC ha 2025 da kaba jop 17 ngut ki MDC na ka 29 tylli ki konstitwensi bad 8 ngut ha JHADC na ki 29 tylli ki konstitwensi.