Wanrah ki MLA NPP ki la ioh pdiang ban iasoh sha ka BJP, kop u Rikman

U President ka Meghalaya BJP u Rikman G Momin hynne ka sngi ula kyntait ia ki khubor hamsaia ba ka BJP ka la pyrshang ban tan ia ki MLA ka NPP da kaba ong ba ka jingkylli kam mih satia ba ngin leit iakren ia ki MLA jong ka paralok lajong.
Haba kren sha ki lad pathai khubor u Rikman ula ong, “Balei ngin leit iakren? Ka NPP ka dei ka paralok jong ngi bad la ai jaka ia ngi ha kane ka Sorkar MDA. Balei ba ngin leh ia kata? Kine baroh ki dei ki khubor hamsaia ki bym donkam bala pynsaphriang”.
Haba kylli la ka BJP kan dawa kham bun ka shuki Myntri hadien ba kiew ka jingdon MLA sha ka 10 ngut ha Iingdorbar Thaw Ain, ula ong “Ngim shym la dawa eiei ruh em”.
Hynrei, ula ong ba ka jingkhang jong ka BJP ka plie lut ia baroh ba kin wan iasoh.
“Kito kiba kwah ban iasoh BJP bad kito kiba kwah ban trei na ka bynta ki paidbah ka Meghalaya, ngi pdiang ia baroh ban wan iasoh” ula ong.
Haba kylli la ka party kan leit iakren ia ki MLA ka TMC, u Momin ula ong “Mano mano ruh ki lah ban wan iasoh sha ka party. Ngam shym pyniadei kyrpang ialade bad ka NPP lane mano mano ruh. Kiba kwah iasoh ki lah ban wan”.
Haba kynthoh ia ki jingkam ba ki MLA ka NPP ki la ioh pdiang ia ka jingkhot ban wan iasoh sha ka BJP, ula kop da kaba ong “Wanrah sha nga ia uta u MLA ka NPP khnang ba lada u lah ban pyni iano iano na ka BJP kiba la leit iakren bad u”.
Halor ki khubor ba ka party ka ioh ia ki email ba byrngem, ula ong “Em, Ngam tip ia kata. Ka BJP kam pat ioh pdiang ia ki email ba shah byrngem. Mano ba iathuh ha phi ia kata? Lada ka don ngin ujor da ka ejahar”.