Ki MLA na Khasi bad Garo ki kwah rung BJP, hynrei dang duna number

U Nongialam ka BJP bad MLA ka Pynthorumkhrah u Bah AL Hek hynne ka sngi ula ong, ki MLA na Garo Hills bad Khasi Hills ki long ba kloi ban pyniasoh bad ka BJP hynrei kim lah ban leh ia katei namar kim don nombar ba biang ban lait na ka aiñ shah mait kyrteng ne Anti Defection Law.

U Bah AL Hek ula ong, “Bun ki la phone ban pyniasoh noh sha ka BJP hynrei tang kawei ka jingeh kadei na ka jingbym don nombar, dei na kane ka daw ba kim lah ban pyniasoh bad kin hap ban iaid lyngba ka ain shah mait kyrteng. Nga ju iohi phone call um duna ia ka 4-5 tylli na kylleng ki bynta jong ka Meghalaya. Don kiba la phone na Garo Hills, na Sohiong, West Khasi Hills, Jaintia Hills, Ri-Bhoi. Man ka sngi nga ioh phone call 4-5 tylli. Kine ki briew ki kwah ban wan da ka kynhun ban pyniasoh noh sha ka BJP” la ong u Bah Hek bad ka bynrap, “Nga lah ioh pdiang ia ka phone call na ki MLA na Garo Hills, na baroh ki seng sain pyrthei hynrei ka jingeh ka dei ba kim don ia ka nombar ba kin kynriah seng noh”.

“Nga ong ia phi, ba ki la long kiba kloi hynrei tad haduh ba kin don ia ka nombar kaba biang ba kin lait na ka jingshah pynngat ha ka ain kyntiap seng, ki lah long kiba kloi ki MLA ban pyniasoh. Nga ong ia phi, kine ki MLA kidei na ki seng sain pyrthei ki bapher bapher na Khasi Hills bad Garo Hills” la ong u Bah Hek.

Ula ong, ba ka BJP kam don satia ia kano kano ka jingeh bad ka jingkhang ka plie lut bad ka BJP kan pdiang sngewbha ia kito kiba thrang ban wan ban pyniasoh sha ka seng.