U Lat ka Jylla u Chandrashekar H Vijayashankar hynne ka sngi, ula leit iashim bynta ha ka jingrakhe ia ka Jubili Ksiar jong ka Wangala Festival ha Tura bad ula pynbna ia ka jingai jingiarap da ka Grant kaba T.5 lak sha ka Hundred Drums Wangala Festival Committee kum shi byntya ban pynneh pynsah ia ka riti dustur bad ia ka jinglong tynrai ki jaidbynriew Garo.
Haba kren ha ka jingialang u Lat ka Jylla ula ïaroh ïa ki nongïalam kiba la lamkhmat ha ka por mynshwa ha kane ka thaiñ, kiba la noh synñiang sha ka roi ka par jong ka Jylla Meghalaya bad ula ong ba ka jingai jingiarap pisa lyngba ka Grant ka long kum ka dak ban kyrshan ïa ka jingpyrshang ban pynneh pynsah ïa ki riti dustur bad ia ka pateng tynrai jong ki jaitbynriew Garo.
Na ka liang u Lamphang ka Ïingdorbar Thawaiñ ka Jylla u Thomas A. Sangma, ula batai ia ka jingïaid lynti jong kane ka tamasa ha kine ki sanphew snem kiba la leit noh bad ula ong ba kane ka jingrakhe ia ka Wangala kala sdang nyngkong eh da ka jingtem tang 10 tylli ki ksing hynrei mynta kala nang roi bad ban tem syndon haduh 1000 tylli ki ksing.
Ha kane ka sngi, kaba la khring ban pynshongshit ia ki paitbah kadei ka jingshad bad jingsawa jong ki hajar tylli ki ksing, kaba la tip kum ka ‘Rhythm of Thousand Drums’.
Hadien kane la pynlong ïa ka jingthang ia ka Chachat So•a, ha kaba u Lamphang ka Ïingdorbar Thawaiñ ruh ula ïashim bynta lang, la ioh ruh ia ka bynta jongka Saka Choir kaba rwai ia ka jingrwai Wangala ka “Dimdim Dimchong Dachichong” bad la ioh ruh ia ki jingrwai tynrai na ka Bolabeta Cultural Artists Society na Ranikor bad ka jingshad jong ka Kids Wangala Troupe.
Ha kane ka prokram la wan ban iadonlang u Myntri Sorkar uba khmih ia ka tnad Excise u Brening A. Sangma, u Deputy Commissioner ka West Garo Hills u Vibhor Agarwa, u Chairman ka Hundred Drums Wangala Festival Committee u Ronald Rikman Sangma, ki riewpawkhmat ka thaiñ bad ki paitbah na kylleng ki jaka kynthup ia ki nongjngohkai.
You may also like
-
Hiar arsut ka ïoh ka kot ba shim ram ki briew ba don ha ka bor
-
T.45 klur mang ka sorkar ban maramot ïa ki surok ha Shillong, shwa ka National Games
-
Lada ka sorkar ka kwah ïakren ïa ki mat sahteng, kren hakhmat ki Camera : KJDSTA
-
Lieh ka sor Shillong bad jur ka dheng kali na ka jinghap phria
-
Sdang ka KJDSTA ia ka jingiakhih da kaba sangeh hikai kaba khlem buh por
