Ka MeghGo App kan iarap ia ki nongniah kali bad ki paidbah nongleit nongwan

U Myntri Rangbah ka Jylla u Conrad K Sangma hynne ka sngi ula plie ia ka MeghGo ka Unified Mobility Platform ka Jylla ha Soso Tham Auditorium ha ka jingiadonlang u Symbud Myntri Rangbah ka Jylla u Bah Sniawbhalang Dhar bad ki ophisar ka Tnad Transport.

Haba ai jingkren u Myntri Rangbah ula ong, ka jingsdang ia ka MeghGo, Meghalaya’s Unified Mobility Platform ka mihkhmat ban wanrah jingkylla ha ka leit ka wan bad kit ka bah jong ka jylla.

“Kane ka mobility app kan kyrshan ia ki nongniah kali ka Jylla ban ioh ia ka ‘commission free app platform’ kaba kynthup ia ki nongniah Auto bad ar shaka ban kyntiew bad pynsuk ia ki nongleit nongwan” ula ong bad ka bynrap ba ka thong hi ka long ban pynbha ia ka rukom treikam kaba iaid beit bad ban pynthikna ia ka leit ka wan ki nongjngohkai bad ki nongshong shong kaba biang dor bad kaba iaid ryntih.

Ula iathuh ruh ba ka sorkar ka don ia ka jingthmu ban pyniar ia ka jingpyniasoh bad ban kyntiew ia ka App bad ki 3000 ki jaka sah ne Homestay kiba la bei tyngka da ka sorkar ban thaw ia ka rukom treikam kaba la tip kum ka ‘one-stop booking solution for tourists’.

Ula ai jingmut ruh ba dei ban pyniar ia ka rukom pyntreikam ia kane ka rynsan ban kynthup lang ia ka bynta kaba iadei bad ka rep ka riang da kaba pyniasohlang bad ki nongrep bad ki kali kiban kit ia ki marrep.

“Ka don ka jinglah wat ban pyntreikam ia ki ‘Cold Storage Vehicles’ hapoh jong ka App shisien ba la pyniar ia kane ka projek kaba dang pyrshang” ula ong.

Kane ka rynsan kan pyniasohlang ia ka jingai jingshakri ki taksi, thuk thuk, ka jingai jingshakri lyngba ki kali Tourist, jingot tiket ha ki bos bad ka Passenger Information Systems, ki jingshakri ha kaba iadei bad ki jaka pynieng kali, ‘Electric mobility solutions’ bad ‘Passenger Helicopter Booking services’.

Kane ka App kan kyrshan ruh ia ka jingpyndonkam da ka ktien English, Khasi, Garo bad Hindi ia kaba la pynwandur ban pynsuk ia ka leit ka wan lyngba ka jingtreikam kaba khuid ba suba bad na ka bynta ka bha ka miat jong ki nongniah kali kaban plie lad ia ka sorkar ban ioh khmih bniah ia ki nongshong kali bad ia ki nongniah kali. Ki bynta jong ka jingshngain ki kynthup ia ka jingsam lang ia ki jingtip haba leit sha kino kino ki jaka bad kiba shaniah, ka jingai jingmaham bad ka jingai jingkyrshan ia ki nongpyndonkam.

Ka App kan treikam khlem ka jingshim ia kano kano ka komishon ha kaba ki nongniah kin hap ban siew man la ka sngi 15 tyngka na ka bynta ki thuk thuk, T.20 na ka bynta ki Auto bad T.35 na ka bynta ki taksi.

Kane ka jingsiew kadei kaba la pyniaid da ka Society jong ka Sorkar ban ai ia ka Insurance bad ia ka khusnam jong ka jingtreikam bha.

Kan don ruh ka jingpyndonkam ia ki kor teknoloji ha ka jingiashonglang ha ki taksi da kaba leh ia ka ‘mapping’ ia kumba 39 tylli ki lad ha ka sor ban ailad ia ki nongniah bad ki nongshong kali ban iohi ia ka jingdon ha ka jaka kaban wan kaba kin sangeh ban pynduna ia ka jingpynlut kai ia ka por bad ia ka jingkhapngiah.

Leave a Reply

Your email address will not be published. Required fields are marked *