Ba ieh beiñ ka sorkar ia ka WKH, ot ‘Cake’ shiteng ka HYC ha ka rakhe dap 48 snem ka WKH

Kum shibynta ban pynpaw ia ka jingbym sngewtynnad namar ka jingshah iehbeiñ jong ka District ha ka sorkar ha kiba bun ki liang kata naduh ba la seng ia ka District ha ka 28 tarik u Risaw 1976, ka HYC West Khasi Hills District ka la rakhe ia ka jingdap 48 snem jong ka District mynta ka sngi ka 28 tarik u Risaw 2024, da kaba ot ia u Cake dap 48 snem uba tang shiteng shilliang ha ka jingialang ba lyngkot kaba la pynlong ha khyrdop IB PWD Nongstoin.
U samla Lumlang Kharsyiemlieh, President ka HYC WKH u la ong ba ka jingot jong ka seng ia u Cake dap 48 snem jong ka West Khasi Hills District uba tang shiteng shilliang ka dei halor ban pynsngew sha ka pyrthei halor ka jingshah iehbeiñ jong ka District ha kiba bun ki liang kynthup ia ki kam pynroi, ki kam ba iadei bad ka pule puthi, ka kam sport, ka koit ka khiah, ka jingdon ki ophis sorkar bad ki jaka sah, ka kam khappud bad kiwei kiwei.
U samla Lumlang ha katei ka sngi u la kyntu ruh ia ka sorkar ba kan pynbna sngi shuti noh ha ka 26 tarik u Nailur (September) manla u snem kum ka dak ka jingburom ia ka sngi khlad jong u Maieit Hopingstone Lyngdoh (Bam kwai ha dwar u Blei) bad kum ka jingkynmaw burum ia i Meiieit Spility Langrin kaba dei ka nongiakhun ban pyrshah ia ka jingtih Uranium, na ka liang ka seng ka la pynlong ruh ia ka jingsngap jar ba shi minit.