Plie u CEM JHADC ia ka project kam pynroi ba sahteng da ki phew snem

Ka Durbar Hall ka ba don ha Loomsooiung, Jowai, ha syndah ka stand kali Jowai Shillong, dei ka project jong ka Jaiñtia Hills Autonomous District Council (JHADC) ba la pyntrei da ka civil work department lyngba ka 13 finance commission ka sorkar pdeng, la plie paidbah ia ka hynne ka sngi da u CEM ka JHADC u Thombor Shiwat hadien ka jingsahteng da ki phew snem. Ha kane ka jingplie paidbah la donlang u Phasmoon Dkhar EM ba dei peit ka tnat CWD, u Dy CEM JHADC u Lasky Rymbai, ki MDC ka JHADC, ki ophisar ka JHADC, ki Dolloi naki Elaka bapher bapher bad kiwei ha ka jingialang ba pyniaid ka Barcelona Bamon, Secretary  EC ka Council.U Phasmon Dkhar, haba kren u ong kane dei ka project ba lai jong ka council ba la lah ban pyndep ha ka por jong u, kumta u ai khublei ia ki ophisar kumjuh kiwei pat ki nongtrei ka council kiba la iatreilang naka bynta ban pyndep kloi ia kane ka ïing.

U Lasky Rymbai, Dy. CEM, JHADC u kyrmen ba kane ka ïing kan long kaba pynmyntoi ia ki paidbah ka Rilum Jaiñtia namar ba ha kane ka ïing yn sa iohlad ia phylliew jingmut haba iadei ba ki kam synshar khadar haki Elaka bad Sirdarship. U la pynkynmaw ruh ba ka District Council lyngba ka  Sixth Schedule dei ka stieh ba ai jingiada ia ka jaitbynriew  nalor ba ngi lait ruh na ki khajna Income Tax. U Thombor Shiwat CEM JHADC haba kren kum u kongsan u ong, jingshisha kane ka ïing ym ikop shuh kum kaba thymmai namar bala don ki riew shim kabu ba patrong iaki wire bording, kumta ka EC daka jingpyrkhat ban lait na kiwei pat ki jingshah shim kabu kala rai ban plie noh bad  buh nongap ruh ha kane ka ïing. Halor ka jinglah ban pynurlong iaki kam ka council, u Thombor ula ai khublei iaki nongtrei ka council, kumjuh iaki MDC ka liang pyrshah kiba juh ai jingmut ha kano kano ka kam naka bynta ka bha ka miat jong ka council.

Ha kajuh ka por u kyntu u khot u wer ruh naduh ki nongtrei bad MDC ban don ka mynsiem iatreilang khnang ban lah pynjem ia kino kino ki jingeh ka council. La ioh ruh ka jingkren na u Lotcifer Ryngkhlem, Secretary ka District Council bad kyntien ai khublei na u Rambih Challam, Asst. Chief Engineer, JHADC.