Ka pateng mynta ka dei ban pynneh ia ka jingstad ba la ai ki kpa tymmen: Kong Deity Majaw

Ka North East Society for Agroecology Support (NESFAS) ka la rakhe ia ka sngi ki jaitbynriew trai ri trai muluk ha pyrthei (International Day of the World’s Indigenous Peoples) halor ka phang “Ka Jingburom ia ki Nongkha khun trai ri trai muluk: Ka jingiada ia ka jingim bad ka jingbha jingmiat”.Kane ka jingïalang ka pynpaw ïa ka jingdonkam ka jingtip trai ri trai muluk, ki rukom bam, ka jingsumar tynrai bad ki rukom treikam ba la ïalam da ka imlang sahlang na bynta ka bha miat katba dang rakhe ïa ki nongrep trai ri kum ki nongsumar ia bun jait ki jingthaw. Ia kane ka prokram la pynlong ha ka 7 tarik Nailar ha nongbah Shillong.
Ka Kong Deity Majaw, Executive Member in Charge Law and Legal Affairs, KHADC haba kren kum ka kongsan ka la ong kane ka jinglehkmen kum ka jingrakhe ia ka jingnang jingstad, ka kolshor bad ki riti dustur jong ki Riewlum bad pynkynmaw ki pateng ba mynta ki dei ban don ka jingkitkhlieh ban pynneh ia ka jingstad ba la ai pateng da ki kpa tymmen.
Ka la ai khublei ia ki jingthmu kum ka Mei-Ramew Café bad ka la ai khublei ia ka NESFAS na ka bynta ka jingtrei ban pynneh pynsah ia ka jingstad ki trai ri trai muluk, ban kyntiew ia ki rukom bam ba lah ban neh bad ban pynkup bor ia ki jaitbynriew.
“Nga pynshlur ban bteng ia ki jingpyrshang kiba dei ban iaroh, namar kane ka kam ka wanrah ia ka jingkylla ha ka jingim jong ki briew jong ngi bad ka iada ia ka pateng ka mariang bad ka kolshor ba riewspah jong ngi.” la ka kong Majaw.
Kham ha shwa hab aai jingkren ka Kong D.B.S. Mukhim, Deputy Commissioner (Enforcement), Commissionerate Food Safety, ka Sorkar Jylla, ka la ïaroh ïa ki ASHA, ki nongsumar khun bad ki nongshet jingshet jong ka PM POSHAN bad pynpaw ka jingsngewkhia ïa ki jingeh ba kito ba trei ha ki shnong bad ki skul ki ïakynduh.
Ka kong Mukhim ka la pynpaw shaphang ka jingsdang jong ka na ka shnong nongkyndong bad ka jingiadei bad ki tynrai jong ka. Ka la iathuh ki jaitbynriew kum ki nongsumar ba khlain ia ki jingthaw ba im bad ka la kdew ba ki jaitbynriew Khasi lah ban khein kum ki “riewstad mariang” namar ka jinglah jong ki ban peit bniah bad khein jingkhein katkum ka jingiadei bad ka mariang. Ka la iaroh ruh ia ka jingkyrshan jong ka NESFAS ia ka prokram PM POSHAN kum kawei na ki seng ba la noh synñiang bad pynthikna ba ka sorkar kan bteng ban kyrshan ïa ka NESFAS ha ki sngi ban wan.
U Bah Phrang Roy, Founding Chairperson jong ka NESFA ula ai ka khubor lyngba ka video ha kane ka prokram ba iadei ka jingleit ka FAO ha u snem 2021 shaphang u Nongtraw, ula pynpaw ïa ka jinglong ka mariang bad ka jingpynmih marbam mynta bad ula kynthoh ba ki nongshong shnong ki lah ban ai ki nuksa ba kongsan ban pynneh pynsah ïa ka jingdonkam ki rukom ai jingbam tynrai ban ïoh jinghikai ki rukom shna jingbam trai ri trai muluk.
Ha ka jingialang la ioh ruh ka jingkren na bah Pius Ranee, Bah Shalmistar Khongngain, Kong Pemodini bad kiwei kiwei.
La pynkut ïa ka prokram da ka jingpyni ïa ka kolshor ka ‘Chad Nongrep’ da ki jaidbynriew Lumtrep bad ka Kong Emiki Sohkhlet, Research Associate, NESFAS ka la ai kyntien ai khublei bad pynpaw ka jingsngewnguh ki nongïashim bynta, ki jaidbynriew bad ki nongtrei kiba kyrshan.
Ka jingialang ka la wad bniah ia ki basa bad ki jingpyninam ha katei ka jaka, kynthup ia ki jaka buh symbai, ki samla kum ki nongpyniaid ia ka mariang, ki jingpyni ia ki rukom bam ki trai ri bad ki jingshna jain bad ki jingshna kti.