Palat 20 hajar ioh jinghikai ki samla halor ka ‘Cybercrime & Cyber Safety’ ia ki jingma na ki kam thok Online

Ka Datayug Society ka la pynlong ïa ki prokram pynsngewthuh paidbah halor ka Cybercrime bad Cyber Safety naduh u Jylliew 2023, ka la pynïar mynta ïa ka jingtreikam jong ka sha ki Social Media Influencer bad Content Creator ban pynsngewthuh halor ka jingma na ki kam thok Online, ka jingshah ktah ha ka bor pyrkhat bad kiwei ki jingeh ba mih na ka jingpyndonkam ïa ki rynsan social media.Haba kren sha ki lad pathai khubor ha ka Influencers Meet 2026 ha Shillong, ka Menoka, Founder bad President ka Datayug Society, ka la ïathuh ïa kane ka seng la sdang ha u Jylliew 2023 ban kyntiew ïa ka jingtip bad pynshai halor ka Cyber Safety, khamtam hapdeng ki samla bad ka Datayug Society ka la pynlong bun tylli ki prokram pynshai ha ki skul bad kolej bapher bad haduh mynta ka la poi sha palat 20,000 ngut ki khynnah bad samla pule kylleng ka Meghalaya ban ai jingtip halor ka Cybercrime, Online Fraud bad ka rukom pyndonkam ïa ki rynsan digital kaba shngaiñ. Ka la ong ka seng ka sngewthuh ba ym tang ki khynnah skul bad kolej kiba donkam ïa ka jingtip halor ka Cyber Safety, hynrei ki Social Media Influencer bad Content Creator ruh ki ïakynduh ïa bun ki jingeh ba donkam ban pynsngewthuh bad ban ioh jingïarap.

Ka la ong, shuwa ban wanrah ïa ka jingmut ban pynlong ïa ka Influencers Meet, kam shym la pyrkhat tang kum ka President jong ka Datayug Society, hynrei ka la pyrshang ban buh ïalade ha ka jaka jong ki Influencer ban sngewthuh ïa ki jingeh kiba ki ïakynduh man ka sngi. Ka Menoka kala pynpaw halor ka jingshah ktah ka bor pyrkhat jong ki Influencer bad Content Creator haba bun ki samla kiba pynlut por bad trei shitom ban shna ïa ki Video bad Content, hynrei haba kim ïoh ïa ka jingbun ia ki ‘Likes’, ‘Views’ kumba ki khmih lynti, kane ka lah ban wanrah ïa ka jingsngewsih, jingduh jingkyrmen bad jingshah ktah ha ka jingmut jingpyrkhat ka jongki. Ka la pynpaw ba ka jingkiew ne jinghiar jong ki ‘Likes’ bad ‘Views’ kam dei ban long ka daw kaba pynïaid ïa ka jingim jong ki Content Creator. Ki Influencer ki donkam ban long kiba skhem ha ka jingmut jingpyrkhat bad ban sngewthuh ba ka dor jong ka jingim jong ki kam shong tang ha ka jingbun ki ‘Followers’, ‘Likes’ ne ‘Views’ ha social media. Ka Datayug Society ka la ïatreilang bad ka U-MATTER, kaba trei halor ka jingshah ktah ka bor pyrkhat ne Mental Health, khnang ban wanrah ruh ïa ka bynta jong ka jingkoit jingkhiah ka jingmut jingpyrkhat hapoh kane ka prokram. Ka Menoka kala maham ba ki Social Media Influencer kim lait na ka jingshah thok ne Online Scam.

Kala ong, kiba bun na ki Influencer ha Meghalaya kidei ki samla kiba dang sdang ïa ka jingïaid lynti jong ki bad kim pat don pisa bun ban pynlut ha ki Advertisement, kumta bun ki shaniah ha ka jingkiew hi, kumta haba don kiba tyrwa ba kin pynbun ‘Followers’, ‘Likes’ ne ‘Views’ da kaba siew pisa, ki samla ki lah ban shah pynngop suk ha kum kine ki jingtyrwa.Kala kyntu ïa ki Influencer ba kim dei ban shu ngeit ïa kino kino ki jingtyrwa kiba wan lyngba ka Social Media, hynrei ki dei ban tohkit bad pynthikna bha shuwa ban siew pisa, ban ai ia kino kino ki jingtip ne ki jingtip kiba iadei bad ka bank.Ka Menoka kala ong, kawei pat ka jingthmu jong ka Influencers Meet ka long ban wanrah lang ïa ki Content Creator ha kawei ka rynsan, khnang ba kin ïasam ïa ki jingshem, ki sap bad ki jingtip halor ka rukom shna Content.Ia kane ka Influencers Meet 2026 la pynlong da ka Datayug Society, U-MATTER, VoxImpact by VoxCrest Media bad ka Meghalaya AIDS Control Society (MACS), da kaba wanrah lang ïa ki Social Media Influencer, Content Creator bad ki riew paidbah na ki bynta bapher bapher. Ka thong jong kane ka jingïalang ka long ban kyntiew ïa ka jingpyndonkam kaba don jingkitkhlieh ïa ki rynsan digital bad ban pynshlur ïa ki Influencer ba kin pyndonkam ïa ka bor jingktah jongki na ka bynta ka jingbha jong ka imlang sahlang.